روزنامه وطنداران

محرم الحرام سته دوڅ بولی(عاشورا) بګانه

ایموسته اسلام سته دین تں بلیوک مقد سات جی سوره لی وارسته واس گنوا وارمښ پمیوک تسته بګانه ال ننوعیں پارستع معرفی بیسته ای چی امکی واس تں لی کودیوم کوسته مښ منچی بتت کی امشیں سته بتات کی بوتت باامکیاں لسته که پمیوک ګاتی یاکں لی وارسته پوت تں لسته که لی وارمښ پمیوک ال ای .

امکی لی وارواس جی ماس کی ای با امکیاں تع آړه ته رمضان سته ماس سوره آړه دی حج سته ماس سوره آړه سوره دی اشهرالحرم سته ماس ای چی امکیی ماس لسته که اوتاوارمښ پمیوک ګاسته بګانه ابل کتی ایموں بتمیش کی یاکں لی وارسته پوت بدوی اشی موں . څنګں مسلمان ګول وعیں سته اینه بتات بولا کی !یاسته عبادت جی اوتا وارسته کودیوم تں کی ایموسته لی ښواوله محمد صلی الله علیه وسلم سته پوت وعاں ای با امکیاں تں په ګتی لی وا رسته پوت لسته که ښټاموں . الننوعیں اموسته ګنوا کتاب چه قران مجید اسه ګجیکو: ( ښټل تں ما س بګعیں دیڅ آی الله تعالی سته نیزتں امکیا ں تع شتوا ماس ( اشهرالحرم ) مښ مشهورآی، استه واس تع چه الننوعیں بیم جه آسمان پیدا کع سته ای  امکی ماس تں شایاپښی ظلم نں کشیع.) امکی اشهرالحرم ماس شوا آی رجب، ذوالقعده، ذوالحجه، محرم الحرام امنی شتوا ماس عزت وی ماس آی امنی ماس تں کله کوسته وع جوکوسته منچاں تں پوت ګیټ بوسته  حرام آی اچاک دی پولسه تی جهاد چی بلیوک لی کودیوم تع اسه اینه ماس تں مسلمان منچاں کلی اجازه نں وا آی کله پنوی وی اوکښاله ال ننوعیں ګجی کوته شامنی ماس تں یا پښی ظلم نں کشع که الننوریں آړ مخلوق اړاں تع فضیلت جی ګنوا وار پته سته آی کی ! ملایکه تع امکی ملایکه فضیلت ورای کچی ال ننوعیں سه رسالت اول بیبا انسان تع امکی انسان فضیلت جی ګنوا وار وآی کچی الننوعیں پارستع رسالت مښ معبوث کع سته بیبا ع دارتع لیلهالقدر فضیلت وای اسه ماس تع اشهرالحرم جی رمضان المبارک ماس ی واس تع جمعه المبارک واس الننوعیں فضیلت جی اوتاوار جی ګنوا واروی آی اګجاع امکی واس سته جی ماس سته اوتاوار پام تں دمه سته بوله امکی واس تں امیک کودیوم نں کاع بوله چی امکی کودیوم اوبال جی دګر وار سته سبب بوله امنی اشهرالحرم تع اماس دی محرم الحرام سته ماس اسه چی اموسته چیری تاں وی اسه سکال فضیلفت اموں مښ وی اسه کدی کع با ایکی ماس سته چیری وار لی سکال ای چی امکیا تع اودی اینه اسه چی ایکی مای تں قیامت اڅلی اسه ایکی ماس تں می دشیر پیدا بیسه اچاک دی پولسه تی ایکی ماس سته دوڅ وای سکال فضیلت جی اوتاواروی اسه سته اینه چی ایکی واس تں ال ننوعیں نوح علیه اسلام ال طوفان تع ایکی واس تں لسه یا آجیست کتی می موسی علیه السلام فرعون سته دګر وار تع ایکی واس تں لسه یا. اګجاع می اهل کتاب ایکی واس تں پاچتراونګه له اسی کی ولتں محمد صلی الله علیه وسلم مکه ستع هجرت کتی مدینه طیبه پارګوتں اتکی اهل کتاب پاچتر اونګه لاں تں کوده یه چی شا اینه واس پاچتر که اونګه تع اکه ؟ امکیا ګجی کع ا ایمو اینه واس تں آګجاع پاچتر اونګه تمیش چی اینه واس تں ال ننوعیں موسی علیه اسلام فرعون سته ډګر وار تع لسه ی سه که الننوعیں سته شکران اداکوسته دیوکں ایموں پاچتر اونګه ل اسمیش که لی ښوپعل محمد صلی الله علیه وسلم ګجی کع شاتع ایموں موسی علیه اسلام تں سکال تورں اسمیش ایموں سکال حق واسمیش شاتع ال ننوعیں تں شکر کوموں که محمد صلی الله علیه وسلم ګجی کع صحابه کرام تں شادی اینه واس تں پاچتر اونګع که ګجی کعا.

اګجاع رمضان المبارک فرض بی تں ایکی واس تں پاچتر اونګه سته ایموسته لی محمد صلی الله علیه وسلم سته ښنګراستنت جی چارتعاسته اګجاع می ایکی واس تں پاچتر اونګسته سکال فضیلت وار پوع وانه کع سه ګجی کع سه ایکی واس تں پاچتر اونګه سته مع أسه کویں اوبال پمیج ستع ګاسته بوتت اګجاع ایموسته مسلمان ګول وعیں اوګعاماں سته څنګ تع لی کودیوم پاچتر اونګه سته بولا ایکی مښ ال ننوعیں سته رضامندی بدوی اڅل اسه نں اینه مښ چی کار با یاچیت تں یا ښاتیک بیسته مع اړ بدعات جی خرافات مښ ګجی ویشی موں چه ال ننوعیں سته رضامندی بدوی اڅل اسه اګجاع امکی اشهر الحرام تں امکی کودیوم نں کاع بوله چی امکی اشهر الحرم سته عزت جی حرمت پکیور کع واشی سته بولا اګجاع می ال ننوعیں کجی کوتته اینه اسلام سته دین مستحکم جی ښټاں ګودین اسه اسه دی انی کودوی ویسته کو پارستع کار با اصلاحات اوسته چی لسته دین تں چی ال ننوعیں پارستع اموسته مخلوق بنده ښټلی پوت وعاں سته کں چیر لیسته بیبا دی اتکی کوسته وری کدی کوسته نظریه اتکی کی حیثیت نں وا آی آسته می مستحکم دین اسه ال ننوعیں ګجی کوته شا آمنی اشهر الحرم تں یا پښی ظلم نں کشع کوته یا پښی ظلم کوسته اینه اسه چی کی ال ننوعیں سته حکم بیبیا سته تع با پاتسته الننوعیں سته احکام تں نں پاسته یا چیت بیک کوسته یا چیت تں خرافات جی بدعات اوبجاسته یا چیت تں شرعیت تع به پاتسته امنی څنګ یا پښی ظلم کوسته اسه شترک ایموں وعتمیش چی آړ امنی اشهر الحرم سته ګنوا وار جی فضیلت وار پام تں نں دمه تت امنی واس تں کله کوسته کر  کراکوسته تع دوی نں اوکښه تت ایکی اموزعیں امنی فضیلت جی ګنواوار پکیوع که ع وی رشیسته اسه آړ دی کاربا حسین رضی الله عنه اینه واس تں شهید بیسته که تی کار باسته مښ محبت جی لی زعیک واسمیش که کیوع کیوع دګر وار سته چار تں دوی ویتت چی اوری ایموسته اسلام سته شته کشیر دین سته پوت وعاں تں نں ای سته آی امکی کار با اینه واس تں حسین رضی الله عنه شهید بیسه که أمشیں شیوں وتیت چی ایکی اموزعیں یا پیښی ظلم کاع اسه چی الننوعیں اموسته ګنوا کتاب قران مجید تں ایکی کودیوم ووښچه تی بع سی سه کدی کع با یا سته شیوں وسته یا شیوں جیع سته ایموسته اسلام سته دین تں لسته نں ڃمی سه نه دی مع ستاں کں تره واس تع پولسه تی غم پوع وانه کوسته ایموسته دین تں لسته ڃمی سه امکی کودیوم ووښچه بع سی سته آی اګجاع می محمد صلی الله علیه وسلم ګجی کوته ایموں تع نں آی امکی منچی چه کی ولتں مصیبت پع ی با بذردام په ویتی سنه مناں سته ډوک ټکیا سته یا پنسکار وسته سکال پی پی که تی دګر دعا کوله اینه حدیث تع پوعوانه با چی کی ولتں منچی تں مصیبت پعی با بی جای پی پی کوسته کی لی کودیو نں أسیا که شترک آړ پنام مسلمان کار با حسین رضی الله عنه اینه واس تں شهید بیسه که ایموں دی سته مع غم تں بټه واسمیش که سکال بی صبری جی ویں تع پوپاتی سته صفت کوسته سته تع پع سور صحابه کرام مع امتره وار کوسته کی لی کودیوم نں اسه بلکه څنګ صحابه کرام مښ لی زعیک أله اواتیوروک کتی سوراں پاروک کوسته ایموسته دین تں لی کودیوم نں ڃمه ی سه نز دی اولی زعں ل بوتی ویں تع به یاته تی کیوع کیوع خرافات تں دوی ویسته کی لی کودیوم اسه . کدی کع با امنی کودیو ایموسته اسلام سته دین تں لسته نی ڃمی سه اوکه هزار سه پټیار دی ماتم جی م کوسته سوراں اوجوپچوع پمښټه سته لی کودیوم ناسه کدی کع با محمد صلی الله علیه وسلم سته سکال بکعیں صحابه کرام کلی شهادت تں پع سته آی اچاک دی پولسه تی لی ښوپرله محمد صلی الله علیه وسلم سته کع ښتاتس حمزه رضی الله عنه چی سید الشهداء اسه سته کی ولتں شهید بی تں سته پټیار لی ښو پعله صلی الله علیه وسلم کی ماتم جی غم امنی شکل تں چی شترک آړ کوتت نں کع سی اګر آمنی جیست شکل تں ماتم ایموسته دین تں روا بی تں ایموسته لی ښو پع ل صلی الله علیه وسلم تں اینه وری الننوعیں پارستع پع یسی چی حسین رضی الله عنه شهید بول اسه که ګجی کولا سی چه شا حسین پټیار قیامت تں ویک ماتم کشع که چی ګجی نں کع سه.

اینه تع زعسته بوته چی آړ کار با پنام مسلمان سکال بګعیں صحابه کرام امشیں پاچین مؤمن می نں ڃماله آی ،چیره په ګاتی ا نشتروی اسلام سته خلیفه کں ویں تع به پاتتی څنګں شعار چی اشهرالحرم الننوعیں سته شعایر تع آی امکیا ں سته حرمت پکیور پکع واشی سته لی کودیو نں اسه .

کدی کع با الننوعیں ګجی کوته شا امنی واس تں ظلم نں کشع کی که امنی واس تں بذردام په ویسته، ژه ژار ویسته، کټاں وسته، کدی په نګوں اتوزه سته امنی څنګں کودیوم حرام آی. امنیاں کوسته لی کودیوم نں اسه اګجاع ایموسته مسلمان تادبعاں سته آمنی اشهر الحرم تں اچاک دی پولسه تی عاشورا واس تں پاچتر اونګه سته مښ الننوعیں سته رضایت بدوی اشی سته بولا ایکی می ایموسته اڅلی ول کں لی وار ښټاته ایکی تع پولسه تی ویں تع به پاتتی کوی دی لی وار بدوی نں اڅل آی .

چه لی ښواوله محمد صلی الله علیه وسلم اموسته پوت وعاں تں اینه لسته که برں کارکراته کی اینه ماس تں پاچتراونګں سته بولاکی که.

کدی کعبا ایکه ماس تں پاچتراونګں سته بلیوک سکال اجرتع اسه چه الننوعیں پارستع مسلمان ګول وعیں کں نصیب کعسته ای .دوڅ بولی واس په تتی نوبولی محرم کدی ینیڅ بولی محرم سته واس تں پاچتراونګں سته اسه چه ایکه مښ منچی بته کی اموکں لی وارسته پوت ښټالا.

ایکه مښ په تتی اموسته کی اوبال جه اونګته وتع وارای با امکیاں دی په روک کولا.

اګرایموسته لی واروګتمیش با اینه اسه کمی اینه  محرم الحرام سته دوڅ بولی واس تں سوره اواس ورں دی په تتی دیوواس پاچتراونګں تی یاسته کی اوباجی اوتا موټه وارای امکیاں پمیج ستع ګاست بګانه ابل کوست بولا اینه پوت تں کی بدعات جی ورں دی خرافات تع یاسته شوں بدیوع کوسته بګانه ابل کوسته بولا .

استه ولتں ایموسته کودیوم مښ لی وارجی ثواب بدوی اشیں بل اسمیش نی با کی دی ایموسته ګول تں کی آړه کودیوم وعسته بوتت با سته مښ لی وارسته پوت بدوی انه اڅلی اسه .

امنی کی اوتاموټه وارسته کی کودیوم کوسته بوتت باامکیاں تع یاسته شوں بدیوع کتی لسته که لی ښواوله محمدصلی الله علیه سته سته کی سنت جی لی چارای با امکیاں تں په ګتی ایموسته څنګںلی وارسته کی کودیوم ای با امکیاں ښی تں پعواسته مښ برﺉ وارسته پوت بدوی اشی اموں.

ویں تع به پاتسته مښ کی دی لی واربدوی نه اڅل ای اینه بګانه لسته که لی وارسته پوت تع اتیوع وریسته ابل کوسته بولا ایکی مښ ایموکں لی واراسه.

ګروارتع بدیوع بوسته ایموسته څنګں سته ارنګں ټه بتات اسه .

دموک وع وعی ګوښع عبدالرزاق

 

ممکن است شما دوست داشته باشید