روزنامه وطنداران

اسلامی نظام ایک بړو ارزو ایس دیس کا بیسڼاں کو تهو جی هوڼ هت ته آګیو

کاډ ایک لمه مبارزه کتنه سماں کاتی اسلامی امارت ایس دیس مه حاکم هوګیواے، انتی وه همیش کو ارزو ایس دیس که مسلماڼ لوکاں کو هوڼ پورو هوګیواے. نو پکاراے جی ایس اسلامی نظام تی هبیں بیسڼه ایس دیس کا محافظت کرلیاے انتی اوس استقرار کابستی اپڼی جن نه مکلف دیکهلیاے. اسلامی نظام کا حاکمیت هوڼ پو هوڼ هم ایس دیس ایک مناسب فضا ژیت کو درهاواں اے جی هبو لوک ایس دیس کو ایک ارامی مه انتی خوشحالی کا فضا مه اپڼی ژیت کا هبه کماں نه اگی لچلی. اسلامی نظام موچاں شیداں ایس دیس کاں کی رت پو هت ته ایواے انتی رکهڼ ایس نظام ایک دینی تی ملی وجیبه هبه بیسڼه ایس دیس کاں کی اے اسلامی نظام کا رکهڼ کابستی اپڼی جن نه مکلف دیکهلیاے. کاډ بیاں سمه جهاد کاں تی هوڼ هم ایک سوچو اسلامی نظام ایس دیس مه درهاواں اے، نو یو نظام موچاں قرباڼیاں پو هت ته آیواے انتی ایس اسلامی نظام کو رکهڼ ایک ملی وجیبه هبه بیسڼه ایس دیس کاں کواے جی اپڼه اسلامی نظام تی حمایت کرلیاے انتی اوس کی حفاظت کابستی جن نه مکلف دیکهلیاے. یو نظام ارمان اون شیداں کواے جی اوناں نی اپڼی سوڼی ژیت ایس راه مه هت تی دیتی اے، انتی هم اج اون کا مدیون احسان کا اے. کاډ ایستی جی اشغال گر امریکا نی اپڼه هبه دار دسته سمیت افغانستان پو حملو کیو انتی یو دیس اپڼه هت کی هیټ آڼ لیو نو افغانستان کا غیرت مند تی مجاهد لوک نی  یو اشکار تجاوز امریکا کو تحمل نکرسکیو انتی هر ډهاتی جهاد امریکا کا تی ناتو کا مقابل مه اعلان کے جی ایس گهوړ مه موچ جوان مهاره دیس کا چی وی اکثر حافظ  قرآن عظیم الشان کاتی مولوی تی طالب مدرساں کا تها ایس ګهوړ مه شید هویا، انتی سوڼی جن اپڼی اوناں نی هت دیتی ولی یه جهاد افغانستان کا متدین لوک نی دوام تا اوس وخت تاکڼو جی امریکا نی شکست کهدو انتی ایس دیس تی موکاړو پهچیں چورلیو. امریکا موچ بړه کبر تی غرور پو افغانستان ته آیو تهو ولی ایستی نیں تهو خبر جی افغانستان اپڼه ډهیډ مه ایسه جوان تی مبارز درهاے جی کتنی امپراطوریاں نه شکست دیتواے، انتی اخر مه بهی یو امریکا تهو جی اینویں موکاړو ایس دیس پهچیں نکهړگیو. کیوزن چی آپی اکثر بار کا دیساں کا ایس گل نه ډاگ کیاے جی افغانستان قبرستان امپراطوریاں کواے انتی ایس دیس نه کویں بهی زور پو نیں نپ سکتو ایس خاطر پوجی یو دیس ایسو باغیرت تی باشهامت لوک درهاے جی بیگانه کا زور نه تی تجاوز نه کدے بهی اپڼی جن پو نیں منته، انتی اخر لحظه اپڼی عمر کی تاکڼو مبارزه اپڼه تجاوز کرناں کا مقابل مه دوام دیاے. هوڼ شکر الحمدالله جی جهاد افغانستان کا لوکاں کی نی نتیجو چادیتو انتی اشغال کرنو موکاړو پهچیں چور لاچهیو نو هوڼ هبه لوک افغانستان کابستی پکاراے جی ایس اسلامی نظام تی حمایت کرلیاے انتی کوشش کرلیاے جی همیش کابستی هم ایس رقم اسلامی نظام درهالیاں. اسلامی امارت هوڼ مکلف اے جی هبه شرعی قوانیناں نه ایس دیس مه تطبیق کرلیاے تاجی لوک افغانستان کرسکلیاے ایک اسلامی تی ارام نظام کی هیټ اپڼی ژیت نه آگته لیکی چل جاے. اسلامی نظام کا تطبیق پو هبو لوک ایس دیس کو کرسکی ایک با ابرو تی باعزت ژیت ایس دیس مه درهالیاے.

 

 

 

ممکن است شما دوست داشته باشید