روزنامه وطنداران

احترام ماں باپ کی هر وخت مه ایک ضرور کم اے

کیوزن چی تم هبه پړنه محترماں ته معلوم اے چی ۲۴ بیں مو دیں جوزا که چن کی چی برابڼ اے جهانی دیں ماں که پو. یعنی تجلیل اوس مقام کوچی وه ایس رقم ایک موجوداے چی اوسنی اپڼی هبه عمر وقف اپڼه جاکتاں کی تربیه مه لنګهئے ایں،انتی وه موجوداے چی پیل که مدرسه تعلیم انتی پیل که معلم انساناں که ناں پو یاد هوے. نوایس خاطر پواے چی قدر تی احترام ماں کی هبه لوک جهان کاں کی بیچ،انتی هر ادیاں تی فرهنګ مه ماں نه اوچو مقام تی دیتواے انتی همیش ایس ګل پو تاکید کئے چی ماں هر وخت مه چی هوے قابل قدر اے انتی باید احترام هوجاے. ماں ډاګ کرنی دوستی کی اپڼه جاکت ته انتی پیل کی انسان اے چی هر کیں تی اپڼه اولاد نه دوست دیکهی انتی ایس خاطر پواے چی اپڼی هبه سوڼی تی چنګی عمر نه اپڼه جاکت کی تربیه مه لنګهاے. نوایس رومه ټهار ایس ګل کی اے چی ایس عالیقدر موجود نه همیش که بستی احترام کراں،انتی الله متعال نی هم یه موجود موچ زیاد هم تم ته ایس ګل کو امر کیواے چی باید اپڼه ماں باپ نه هم احترام کرلیاں تی اوناں کی قدر نه همیش که بستی درک کرلیاں تی ټهار آڼ لیاں.انتی الله متعال نی احسان تی نیکی کرڼ ولدین ناړ همردیف اپڼی عبادت کی قرار دیتی اے،انتی اپڼی رضا تی خوشی اوناں کی رضا مه تی خوشی مه دیټهی اے. ایکی روایت مه آی چی حضرت ابی هریره رضی الله عنه اوس وخت مه چی نیند تی جاګی تهو تی مهیں اپڼه چیړه لاڼ تی کاډ اپڼی ماں کوڼ ته چلی تهو انتی کیا تهو:سلام تی رحمت الله کی تنپو هویوں آی ماں الله متعال تنه نیک جزا دیوں ایس خاطر پوجی تیں هم نیکه توب که وخت تی اینګه تربیه کیا انتی بړه کیا،اوس کی ماں هم مقابل مه کیاے تهی:آی میره پوت الله متعال تنه هم خیر تی جزای نیک دیوں چی تو میره مقابل مه نیکی کرے.انتی یه ګل هم کی یه ګئے اے چی هر وخت مه چی حضرت ابوهریره رضی الله عنه بار تی هم آی تهو مهیں این ګلاں نه تکرار کرے تهو نو ایکو نمونه چلڼ صحاباں کو تهو اپڼی میاں که مقابل مه. انتی هم ایس وزن ایکی دوچی روایت مه حضرت عبدالله بن مسعود رضی الله عنه کیا چی: رسول الله تی میں تپوس کیو کیړو عمل الله متعال که نزد مه چنګو اے اوسنی کیو نواج نه اپڼه اوس وخت پو پړن الله متعال که نزد مه چنګو کم اے،مهیں میں تپوس کی کیړو کم بهتراے کیو نیکی کرڼ ماں باپ ناړی. انتی قرآن کریم کی موچاں ټهاراں مه هم ماں کی زحمتاں تی انتی اوس که حق نه سیاڼڼ که بستی موچاں ټهاراں مه اشاره هویں اے انتی کیواے چی:ترجمو(هوں انسان ته وصیت کروں اے چی اپڼه ماں باپ ناړی چنګ توب پو ناړی چلڼ کروں،ایس خاطر پوچی ماں زحمت پوتی رنج پو وه حمل کیو انتی رنج پوتی مشقت پو دنیا ته آڼیواے؛انتی دود پیڼ کو وخت تی حمل کو وخت تریں چن اے. انتی ایس وزن پیامبرصلی الله علیه سلم تی احترام تی حقوق ماں که باره مه کیواے جی: حضرت ابوهریره رضی الله عنه روایت هویں اے چی ایکو جڼو حضور رسول الله صلی الله علیه وسلم کاته ایو تی کیوچی: یارسول الله! کوڼ میپو موچ حق درهاے چی هوں اوس ناړی چنګه طریق پو چلڼ کروں؟ رسول الله صلی الله علیه سلم نی اګته کیو ماں، مهیں جڼه تکرار کیو مهیں کوڼ پیامبرصلی الله علیه وسلم نی کیو باپ(بخاری تی مسلم) ایکی دوجی حدیث شریف چی حضرت انس بن مالک روایت وه کیا چی حضرت رسول الله صلی الله علیه وسلم نی خدمت تی نیکی کرڼ ماں نیړے ثواب حج عمره تی مجاهد که ناړ بیان کیو. انتی پیامبر صلی الله علیه وسلم نی اوس ادمی که باره مه هم کیواے چی وه اپڼه ماں باپ کی احترام نیکرتو انتی اوناں ناړ چنګو چلڼ نیکرتو.پیامبرصلی الله علیه وسلم کیاچی ترے طائفه لوک اے چی جنت ته داخل نیں هوسکته پیل کو وه اولاد چی ماں باپ که ډهاتی عاق هویو هوے،دومو دیوث،تریمو وه جڼو چی اپڼی جن نه تریم تیاں که شان تاکڼو جوړے. دین مقدس اسلام نی اهانت انتی استعمال لیر کی تی بهړی ګل ماں باپ که مقابل مه حرام کئے ایں. نوایس خاطر پو مهاره تهاره بستی واجب اے چی اپڼه ماں باپ نه احترام کراں انتی نهایت آداب پو اوناں ناړ چلڼ کراں ایس خاطر پوچی پیامبرصلی الله علیه وسلم کیاچی:وه بندوچی مطیع اپڼه ماں باپ کوتی اپڼه پرودګار کو هویں نو قیامت کی دیں وه اوچه مقام مه هویګو.اما این دوناں که بیچ مه رعایت ماں که حق کو اولویت مه قرار درهاے. نو محترمو باج شک تی اګر هم تم اون هبه زحمات ماں کینه چی حمل که وخت تی شروع تا دود دیڼ تی بړه کرڼ تاکڼو نظر مه نپ لیاں نو هر کتنو چی انسان ایس راه مه کوشش کرلیاے نو مهیں بهی ماں که حقوق که مقابل مه ګهټـ اے. نوباید احترام کرڼ تی خدمت کرڼ ماں باپ ناړی هر وخت باید هم تم ایک لازمی تی ضروری امر دیکهلیاں انتی کوشش کرلیاں چی کدے بهی مهاره ماں باپ هم تی خپه نه هوجاے،انتی هم تم
کوشش کرلیاں چی اوناں که حق تی حقوق نه پورو کرلیاں تاچی کامیابی دونه جهان کی مهاره تهاره نصیب مه هوجاے.

 

 

 

 

ممکن است شما دوست داشته باشید