چین: امریکا او لوېدیځه نړۍ د خلکو د کډوالۍ لامل دی

د روان کال د جون ۲۰مه نېټه د کډوالو له ۲۲مې نړیوالې ورځې برابره وه.

د چین د بهرنیو چارو وزارت وانګ ون بین په همدې ورځ په یوه مطبوعاتی غونډه کې وویل، چې د امریکا په شمول ځینو لوېدیځو هېوادونو په تېر اوږد مهال کې د نړۍ په بېلا بېلو سیمو کې جنګونه رامنځته کړی او اوس هم د نورو هېوادونو په کورنیو چارو کې لاسوهنې کوی او بشر یې له کړکېچونو سره مخ کړی دی.

نوموړی وویل، چې لوېدیځه نړۍ د کډوالو مسئلې رامنځته کوونکی دی.

د ملګرو ملتونو د کډوالو چارو عالی کمیشنرۍ په دې وروستیو کې کلنی راپور خپور کړی، چې له مخې یې په نړۍ کې د بې ځایه شویو خلکو شمېر په لومړی ځل له ۱۰۰ میلیونو څخه زیات ښودل شوی دی.

‌ د ملګرو ملتونو د ماشومانو صندوق څېړنې ښیی، چې د ۲۰۲۱م کال تر پایه پورې ۳۶ میلیونه او ۵۰۰ زره ماشومان د شخړو،‌ زورزیاتی او نورو بحرانونو له امله له خپلو کورنیو جلا شوی، چې دغه شمېر له دوهم نړیوال جنګ راهیسې تر ټولو لوړ دی.

وانګ ون بین وویل، چې یادې شمېرې د دې ښکارندویی کوی، چې ځینی هېوادونه په خپل سر پر نورو هېوادونو تېری او په کورنیو چارو کې یې لاسوهنې کوی او بشری بحرانونه یې راپورته کړی دی.