طالبانو د افغانستان زېربناو ته یو میلیارډ ډالر زیان رسولی

ولسمشر محمد اشرف غنی وایی، د وسله والو طالبانو حرکاتو د افغانستان زېربناو ته یو میلیارډ ډالر زیان رسولی دی.
ولسمشرغنی دغه خبره پرون سه شنبه په ارګ کې د حکومتولۍ او بشری سرچینو د اونۍ په غونډه کې د خبرو پر مهال وکړه او پر طالبانو یې غږ وکړ چې که په هېواد کې عامه ځایونه نه شی جوړولی د تخریب مخه دې ونیسی.
د نوموړی په خبره که طالبان غواړی چې د خلکو په زړونو کې ځای پیدا کړی، نو پل، پلچک ښوونځی او هغه ځایونه چې عام خلک ترې ګټه پورته کوی زیان نه اړوی.
نوموړی زیاته کړه: “د طالبانو حرکاتو د افغانستان زېربناو ته یو میلیارد ډالر زیان رسولی دی. نو زه ورباندې ناره کوم، ولې ورانوی، ولې خرابوی؟ که د جوړولو قوت نلری، که مثبت پروګرام نلری حد اقل د خرابی مخه ونیسی.”
هغه د کندهار ولایت په ارغنداب ولسوالۍ کې د طالبانو وروستۍ جګړې ته په اشارې وویل چې په دې ولسوالۍ کې دوه لوی پلونه او ګڼ شمېر پلچکونه د طالبانو له خوا وران شوی او په وینا یې چې په ټوله ولسوالۍ کې ماینونه ځای پر ځای شوی دی.
هغه وویل که تاسو (طالبان) د ارغنداب کیسه تکراروی نو په وینا یې ولس به خپله قضاوت وکړی.
بله خوا د حکومتولۍ او بشری سرچینو اونۍ د غونډه پر مهال په بلخ، کندهار، هرات او ننګرهار ولایتونو کې ۱۰۰ تکمیل شوی پروژې هم افتتاح شوې.
ولسمشر وویل، پر یادو پروژو پنځه میلیارد افغانۍ لګښت راغلی دی.