ستولتنبرګ: ناټو له افغانستانه د ځواکونو د ویستلو په اړه پرېکړه نه ده کړې

د افغانستان اسلامی جمهوریت جمهوررئیس محمد اشرف غنی د ناټو سازمان سرمنشی ینس سټولتنبرګ سره ټلیفونی خبرې وکړې.
په دې ټلیفونی مکالمه کې، دواړو لوریو د سولې پروسې، د ناټو سازمان د غړو هیوادونو د دفاع وزیرانو کنفرانس او د افغانستان له امنیتی او دفاعی ځواکونو د ناټو دوامداره ملاتړ په اړه بحث او خبرې وکړې.
د ناټو سازمان سرمنشی ینس سټولتنبرګ د ناټو سازمان د غړو هیوادونو د دفاع وزیرانو کنفرانس په اړه جمهور رئیس ته معلومات ورکړل وې ویل، د ناټو سازمان غړی هیوادونه د افغانستان د سولې پروسه کې له فعالې ډیپلوماسۍ استفاده کوی، ترڅو دغه پروسه بریالۍ شی.
هغه په افغانستان کې د تاوتریخوالی زیاتېدو په اړه د اندېښنې څرګندولو ترڅنګ وویل، د دې سازمان د ټولو غړو هیوادونو پرېکړې به مشروطې وی او په هغو کې به له امریکا متحدو ایالتونو سره له نږدې همغږی وکړی.
د ناټو سازمان سرمنشی له افغانستان څخه د امریکایی او ناټو ځواکونو د خروج په اړه وویل، مشورې دوام لری او تر اوسه په دې اړه تصمیم نه دی نیول شوی او همداراز د طالبانو او امریکا ترمنځ د لاسلیک شوی هوکړه لیک بیاکتنه د امریکا متحدو ایالتونو له لوری جریان لری.
په دې ټلیفونی تماس کې، د ناټو سازمان سرمنشی ینس سټولتنبرګ په سوله ییز ډول د افغانستان د ستونزې پر حل ټینګار وکړ او په افغانستان کې یې له پایداره او باعزته سولې ملاتړ وکړ.
همداراز نوموړی وویل، له ترورېزم سره په مبارزه کې د افغانستان له امنیتی او دفاعی ځواکونو د ناټو سازمان ملاتړ دوام لری.
ښاغلی ستولتنبرګ د پنجشنبې په ورځ (سلواغې ۳۰) د د ناټو د دفاع وزیرانو د مجازی غونډې په پای کې وویل: “تر اوسه مو په افغانستان کې د راتلونکی حضور په اړه وروستی تصمیم ندی نیولی خو د مۍ د میاشتې د لومړۍ نینې ضرب الاجل په نژدې کیدو سره به مونږ د متحدینو په توګه مشورو او هم اهنګۍ ته دوام ورکړو.”

د ۲۵۰۰ امریکایی پوځیانو په ګډون شاوخوا ۹۶۰۰ بهرنی پوځیان همدا اوس د ناټو د غوڅ ماموریت په چوکاټ کې په افغانستان کې میشت دی او د افغان امنیتی او دفاعی ځواکونو د روزنې او مشورې چارې پرمخ بیایی.
د ۲۰۲۱کال د می تر میاشتې پورې د افغانستان څخه په بشپړه توګه د بهرنیو ځواکونو وتل، د طالبانو د تاوتریخوالی کمیدل، د القاعده په ګډون تروریستی ډلو سره ددې ډلې د اړیکو شلول او د سولې د مذاکراتو سره ددې ډلې یوځای کیدل سره تړلی عناصر دی چې د امریکا-طالبانو په موافقه کې واضح شوی دی.
په داسې حال کې چې په افغانستان کې د طالبانو تاوتریخوالی لا هم جاری دی او د افغانستان د اسلامی جمهوریت او طالبانو استازو ترمنځ مذاکرات لا هم بې نتیجې دی، د امریکا د دفاع وزارت رپوټ ورکړی چې طالبان لاهم د القاعده شبکې سره اړیکې لری او د القاعده غړی د طالبانو د لیکو او سوق او ادارې په جوړښت مدغم شوی دی.
ښاغلی ستولتنبرګ وویل چې طالبان باید د نړیوالو ترهګرو ډلو سره همکاری چې پر لویدیځ باندې د بریدونو لپاره پروګرام شوی بنده کړی. هغه وویل: “اوس باید د [افغانستان] سولې بهیر بیا غښتلی شی…طالبان باید په نیک نیت مذاکره وکړی…تاوتریخوالی راکم کړی.”