د کابینې په غونډه کې د مهمو موضوعاتو په اړه فیصلې وشوې

شریعت: د افغانستان اسلامی امارت د نوی کال «۱۴۴۴هـ ق» د کابینې لومړۍ غونډه د ښاغلی رئیس الوزراء الحاج ملا محمد حسن اخند په مشرۍ او د ټولو وزارتونو د سرپرست وزیرانو او د مستقلو ادارو د محترمو رئیسانو په ګډون ترسره شوه.

غونډه چې د قرآن کریم د څو مبارکو آیتونو په تلاوت پیل شوه، د یو شمیر لغوه شویو ادارو د کارکونکو د برخلیک ټاکلو، د ترافیکی پېښو او بې نظمیو د مخنیوی طرحې بیا کتنه او نوری فایبر د غځونې اړوند پالیسۍ څېړنې په اړه پکې بحث وشو.

د کابینې د پریکړې له مخې د افغانستان اسلامی امارت د چارو ادارې لوی ریاست ته دنده وسپارل شوه چې د دې ادارې او د ریاست الوزراء د مقام لوی ریاست له لوری ګډ پلاوی دې د اسلامی امارت د یو شمیر لغوه شویو ادارو د کارمندانو د شمېر، شهرت او ځانګړنو په اړه معلومات راټول او د خپلو ځانګړو نظرونو سره د کابینې غونډې ته وړاندې کړی.

په کابینه کې د ریاست الوزراء اداری مرستیال مولوی عبدالسلام حنفی په مشرۍ د بهرنیو چارو وزارت، ټرانسپورټ، هوایی چلند او د کلیو پراختیا او بیا رغونې سرپرست وزیرانو په ګډون یو پلاوی ته دنده وسپارل شوه چې د ترافیکی پېښو او بې نظمیو د مخنیوی په موخه دې ترافیکی طرحه په دقیق ډول وڅیړی او د ځمکنی ټرانسپورټ له طرحې سره دې د پرتلې او مطابقت وروسته له خپلو نظریاتو سره د تصمیم نیونې په موخه د کابینې راتلونکې غونډې ته وړاندې کړی.

همدا راز د کابینې په غونډه کې د چارو ادارې لوی رئیس شیخ نور الحق انور په مشرۍ د مخابراتو او معلوماتی ټیکنالوژۍ، اوبو او انرژۍ، فوائد عامې وزارتونو، د کابل ښاروالۍ او د احصائیې او معلوماتو ملی ادارې لوړ پوړو مسؤلینو او مسلکی او تخنیکی اشخاصو په ګډون پلاوی ته دنده وسپارل شوه چې د نوری فایبر د غځونې اړوند پالیسی دې په دقیق ډول وڅیړی او پایلې دې د کابینې غونډې ته وړاندې کړی.