د سوری زړه په ناروغۍ اخته نهه ماشومان پاکستان ته ولېږدول شول

باختر آژانس: افغانۍ سرې میاشتې د سوری زړه په ناروغۍ اخته نهه ماشومان پرون د درملنې په موخه پاکستان ته ولېږدول.

په پاکستان کې د الخدمت خیریه بنسټ له لوری د سوری زړه د ناروغانو د درملنې هوکړه لیک د روان کال د شعبان پر ۳مه د افغانی سرې میاشتې د رییس مولوی مطیع الحق خالص او د الخدمت خیریه بنسټ د مشر پروفیسور حفیظ الرحمن ترمنځ لاسلیک شوی و.

د یاد هوکړه لیک پر بنسټ به د الخدمت خیریه بنسټ د پاکستان په پرمختللو روغتونونو کې د سوری زړه په ناروغۍ د اخته ماشومانو درملنه کوی.

د یادو روغتونونو د کیفیت او کمیت په اړه د افغانی سرې میاشتې د روغتیا د کارکوونکو یو لوړ پوړی پلاوی تېره میاشت پاکستان ته تللی و.

یاد هوکړه لیک د افغانی سرې میاشتې له لوری په تېرو ۱۳ کلونو کې تر ټولو د تخفیف، سهولت او کیفیت له پلوه غوره هوکړه لیک دی، چې پر بنسټ به یې په پرلپسې ډول د سوری زړه په ناروغۍ د اخته ماشومانو درملنه کېږی.

تر دا مهاله افغانی سرې میاشتې له ۱۳۰۰۰ د زیاتو د سوری زړه په ناروغۍ د اخته ناروغانو درملنه کړې او له ۷۰۰۰ زیات ناروغان دا مهال له افغانی سرې میاشتې سره ثبت دی.

د افغانی سرې میاشتې چارواکی وایی، چې هڅه کوی د یادو ناروغانو په اړه په هېواد کې دننه له څو سترو روغتونونو سره هم ورته هوکړه لیکونه لاسلیک کړی.