روزنامه اصلاح
ریاست روزنامه های دولتی افغانستان

د حضرت محمد صلی الله علیه وسلم سپېڅلی ژوند

بعثت

اتمه برخه / ژباړه: محمدعلی عظمت

   کله چې د محمد صلی الله علیه وسلم عمر څلوېښتو کلو ته ورسېده، الله جل جلاله دی د ټولو مخلوقاتو لپاره رحمت او د ټولو خلکو لپاره زېری ورکوونکی ولېږه.

   او الله تبارک و تعالی چې له ده څخه وړاندې کوم رسولان علیهم السلام استولی وو، له هغو څخه یې کلکه ژمنه اخیستې وه، چې پر ده به اېمان راوړی او تصدیق به یې کوی او چې څوک د ده مخالفت کوی، نو د ده مرسته به کوی.

   او له هغو څخه یې دا وعده اخیستې وه، چې څوک په دوی اېمان راوړی او د دوی تصدیق کوی، هغو ته به دا امانت رسوی، نو هغو (انبیاو علیهم السلام) هماغه ورسپارل شوی امانت په رښتونې توګه ورسولو.

   الله جل جلاله محمد صلی الله علیه وسلم ته وایی: [وَاِذْ اَخَذَ اللہُ مِیْثَاقَ النَّبِیّ۪نَ لَمَآ اٰتَیْتُکُمْ مِّنْ کِتٰبٍ وَّحِکْمَهٍ ثُمَّ جَا۬ءَکُمْ رَسُوْلٌ مُّصَدِّقٌ لِّمَا مَعَکُمْ لَتُؤْمِنُنَّ بِھ۪ وَلَتَنْصُرُنَّھ۫ﺚ قَالَ ءَاَقْرَرْتُمْ وَاَخَذْتُمْ عَلٰی ذٰلِکُمْ اِصْرِیْﺚ] ژباړه: او (هغه وخت په زړه کړئ) کله چې الله له پېغمبرانو وعده واخیستله چې: «که ما تاسو ته کتاب او حکمت درکړ، بیا تاسو ته رسول راغی هغه د دې کتاب تصدیق کوونکی دی، کوم چې له تاسو سره دی، تاسو به هرو مرو پر هغه اېمان راوړئ او خامخا به یې مرسته کوئ». الله تعالی (هغو پېغمبرانو ته) وویل: «آیا تاسو د دې خبرې اقرار کوئ او زما له لوری درکړل شوی پېټی (بار) مو واخیست؟» دوی وویل: [قَالُوْٓا اَقْرَرْنَاﺚ قَالَ فَاشْھَدُوْا وَاَنَا مَعَکُمْ مِّنَ الشّٰھِدِیْنَ] یعنې دوی وویل: «مونږ اقرار وکړ». الله وویل: «نو بیا د یو بل د اقرار شاهدان شئ.» او زه هم له تاسو سره په ګواهانو کې شامل یم. د آل عمران سورت (۸۱) آیت.

   نو الله جل جلاله له ټولو انبیاو څخه د دې تصدیق وعده واخیستله. همداشان څوک چې د ده مخالفت کوی، د هغه خلاف د ده مرسته کولو او څوک چې پر هغو انبیاو اېمان راوړی او د هغو تصدیق وکړی، هغو ته به دا امانت رسوی، دواړو اهل کتابو ته.

ممکن است شما دوست داشته باشید