افغان حکومت: هیچا ته اجازه نه ورکوو چې تاریخی او لرغونې اثار تخریب او زیانمن کړی

شریعت: د افغانستان اسلامی امارت د ریاست الوزراء د مطبوعاتو او همغږۍ رئیس مولوی حبیب الله پرون پروان ولایت ته د سفر په ترڅ کې د پروان توپ درې له استوپې  څخه لیدنه وکړه.

هغه وویل چې پروان ته یې د سفر موخه د یاد ولایت د ښکلو او په زړه پورې طبیعت لیدل او په ځانګړې توګه د توپ درې استوپې څخه لیدنه وه له شک پرته دغې تاریخی آبدې د معمارۍ له سبک څخه ښکاری چې واقعا د یو ارزښتناک او فرهنګی تمدن درلودونکی دی.

هغه سره له دې چې  د تاریخی او لرغونو آثارو د ساتنې په برخه کې د دولت نظر مهم وګاڼه، خو د اطلاعاتو او فرهنګ ریاست او د امنیتی ارګانونو له مسوولینو یې وغوښتل، چې د دې تاریخی آبداتو ساتنې ته زیاته پاملرنه وکړی او هیچا ته اجازه ور نه کړی، چې ویجاړ یې کړی.

د پروان ولایت د اطلاعاتو او فرهنګ رئیس مولوی شمس الرحمن صدیقی د پروان د تاریخی او لرغونو اثارو په تېره بیا د توپ درې د استوپې په اړه د افغانستان اسلامی امارت د ریاست الوزراء د مطبوعاتو او همغږۍ مسوول ته معلومات ورکړل او ویې ویل چې د توپ درې استوپه له ۱۸۰۰ کلونو څخه زیاته لرغونتیا لری چې نه یواځې په افغانستان کې، بلکې په سیمه ایزه کچه ځانګړی اهمیت لری.

نوموړی ډاډ ورکړ، چې د تاریخی او لرغونو سیمو د ساتنې له قطعې سره په همغږۍ به د دغه آبشار او د پروان د نورو لرغونو اثارو ساتنه وکړی او هیچا ته به اجازه ورنه کړی، چې ویجاړ یې کړی.