روزنامه اصلاح
ریاست روزنامه های دولتی افغانستان

افغان حکومت د مسکو د غونډې د ګډې اعلامیې هر کلی وکړ

د افغانستان د بهرنیو چارو وزارت په مسکو کې د افغانستان دسولې په اړه د «ترویکا» ناستې له ګډې اعلامیې هر کلی کړی او هغه یې سولې ته د رسېدو په هدف د جدی مذاکراتو د پیلېدو په لور یو مثبت ګام بللی دی.
د بهرنیو چارو وزارت پرون جمعه مارچ ۱۹(کب ۲۹) د یادې ناستې په ګډې اعلامیې کې د ملګرو ملتونو د ۲۵۱۳ قطعه نامې پر تطبیق، د افغانستان د کړکېچ پر سیاسی هواری د ټینګار او دا چې په افغانستان کې د «اسلامی امارت» د بیا رامنځته کېدو ملاتړ نه کو، هرکلی کړی.
د بهرنیو چارو وزارت په اعلامیه کې راغلی: “د افغانستان دولت د یادې اعلامیې د صراحت په اړه چې ویلی دی «موږ د اسلامی امارت د رامنځته کېدو ملاتړ نه کوو…هر کلی کوو. پر دې اصل ټینګار کوو چې د افغانستان په شان یوه متنوع او متکثره ټولنه کې د ولسواکۍ او د نظم او ثبات د ساتلو، د سیاسی مشارکت د ټینګښت لپاره اسلامی جمهوریت یوازینی ټول شموله او د منلو وړ جوړښت دی.”
امریکا، روسیې، چین او پاکستان (ترویکا هیوادونه) پنجشنبه د یوې ګډې اعلامیې په خپرولو سره وویل چې په افغانستان کې د طالبانو د اسلامی امارت د بیا رامنځته کېدو ملاتړ نه کوی.
په اعلامیه کې راغلی: “هماغسې چې د ملګرو ملتونو د امنیت شورا په ۲۵۱۳ (۲۰۲۰) پریکړه لیکونو کې بیان شوی، مونږ د اسلامی امارت د بیرته راژوندی کیدو ملاتړ نه کوو او د افغانستان د اسلامی جمهوریت او ددې هیواد د ملی مصالحې د عالی شورا نه غواړو چې په علنی توګه د خپلو طالب سیالانو سره د مذاکراتو له لارې د یوې حل لارې لپاره تعامل وکړی.”
د بهرنیو چارو وزارت په اعلامیه کې زیاته شوې چې افغان حکومت د اوربند ټینګېدو او سیاسی حل لارې ته د رسېدو لپاره د محتوا لرونکو او جدی مذاکراتو د پیلېدو لپاره چې د جګړې د پای ته رسېدو او سولې ټینګېدو لامل شی چمتو دی.
د افغان سولې په اړه د مسکو ناسته دپنجشنبې په ورح تر سره شوه چې د پاکستان، چین، روسیې او امریکایی استازو په ګډون د افغان حکومت او طالبانو استازو هم پکې ګډون کړی و.

ممکن است شما دوست داشته باشید