افغان حکومت د سولې په اړه د اروپا پارلمان د پرېکړه لیک هر کلی وکړ

د بهرنیو چارو وزارت په افغانستان کې د سولې ټینګېدو او جګړې ختمېدو په اړه د اروپایی پارلمان د پرېکړه لیک هر کلی وکړ.
اروپایی پارلمان په دې وروستیو کې په افغانستان کې د تاوتریخوالی زیاتوالی په اړه اندېښنه ښودلې او پر ملکی وګړو او افغان سرتېرو باندې د طالبانو د بریدونو بندېدو غوښتنه یې کړې ده.
د افغانستان د بهرنیو چارو وزارت پرون شنبه جون ۱۲ (غبرګولې ۲۲) د اروپایی پارلمان پرېکړه لیک ته په هر کلی سره ویلی چې د افغانستان حکومت د افغانانو په مشرۍ د سیاسی هواری له لارې په هیواد کې د تلپاتې سولې ټینګېدو ته ژمن دی.
د اروپایی پارلمان په پرېکړه لیک کې همدارنګه په افغانستان کې د تېرو دوو لسیزو د لاسته راوړنو او ښځو د حقوقو پر خوندیتوب ټینګار شوی دی.
د بهرنیو چارو وزارت زیاته کړې چې افغان حکومت د ښځو د حقوقو په ګډون د تېرو دوو لسیزو د لاسته راوړنو خوندیتوب ته ژمن دی.
د بهرنیوو چارو وزارت له دغه هیواد څخه د نړیوالو سرتېرو تر وتلو وروسته له افغانستان سره د اروپایی شورا د مرستو له دوام هم مننه کړې ده.

له دې سره هم مهاله په افغانستان کې د بشری حقونو خپلواک کمېسیون په دغه هیواد کې د سولې او ثبات ټینګېدو په اړه د افغان او پاکستانی دینی علماو د پرېکړه لیک هر کلی هم کړی دی.
د تیرې پنجشنبې په ورځ د سعودی عربستان په کوربتوب افغان او پاکستانی دینی علماو د یو کنفرانس په ترڅ کې په افغانستان کې د جګړې پر پای ته رسېدو ټینګار وکړ او د سولې له روان بهیر څخه یې ملاتړ اعلان کړ.
د بشری حقونو کمېسیون د مذاکراتو له لارې د جګړې او تاوتریخوالی پای ته رسېدو او سولې ټینګېدو برخه کې یاد پرېکړه لیک مهم بللی دی.
په افغانستان کې د سولې پر ټینګېدو پر داسې مهال ټینګار کیږی چې جګړو یو ځل بیا په دغه هیواد کې زور اخیستی دی.