روزنامه اصلاح
ریاست روزنامه های دولتی افغانستان

افغانستان له ازبکستان سره د برېښنا پیرودلو لس کلن قرارداد وکړ

د افغانستان برېښنا شرکت د ازبکستان د اوبو او انرژۍ له وزارت سره د لسو کلونو لپاره په پخوانۍ بیه د برېښنا پیرودلو تړون لاسلیک کړ.

دغه تړون وړمه ورځ د سپټمبر پر ۲۱ (وږې ۳۰) په تاشکند کې د سیمه ییزو اقتصادی همکاریو سازمان “CAREC” د انرژۍ وزیرانو په لومړنۍ ناسته کې د افغانستان د برېښنا شرکت د رئیس انجنیر امان الله غالب او ازبکستانی چارواکو ترمنځ لاسلیک شوی دی.

د افغانستان د برېښنا شرکت ویاند وحیدالله توحیدی امریکا غږ ته ویلی، چې په دغه ناسته کې د منځنۍ آسیا هیوادونو (ترکمنستان-ازبیکستان) برېښنا شبکو سره د افغانستان د برېښنا شبکې یو ډول کولو «سنکرونایزیشن» هوکړه هم وشوه، چې په دې ډول به افغانستان ۶۰۰ میلیون ډالره کلنۍ سپما کړی او د برښنا د لیږد برخه کې به د یوې څلور لارې ځای خپل کړی. نوموړی زیاته کړه:”دې سره به خصوصی سکتور ته هم د برېښنا سوداګرۍ اجازه او د برېښنا شبکې له لارې د برېښنا لیږد اجازه ورکړل شی، څو وکړای شی په هیواد کې دننه او یا ګاونډیو هیوادونو ته د برښنا صادرولو چاره آسانه شی.”

د دغه پروژی ټول لګښت اسیایی پرختایی بانک ورکوی.

د افغانستان د برېښنا شرکت د معلوماتو له‌مخې دغه هېواد دا مهال له ازبکستان څخه ۳۰۰ میګاواټه برېښنا واردوی.  د دې ترڅنګ افغانستان دا مهال ۷۰ سلنه برېښنا له ازبکستان، ترکمنستان، تاجکستان، او ایران څخه واردوی، او همدارنګه د خپلې اړتیا وړ ۳۰ سلنه نوره برښنا له خپلو داخلی منابعو څخه تولیدوی

دا نوی قرارداد پر داسې مهال کېږی، چې تېره اونۍ په شمالی ولایت بغلان او کندز کې د وارداتی برېښنا د پایو د تخریب له امله د کابل په ګدون نهه ولایتونه د څو ورځو لپاره له برېښنا څخه بې برخې و.

ممکن است شما دوست داشته باشید