روزنامه هیواد
ریاست روزنامه های دولتی افغانستان

نادری: د دولتی کارکوونکو په ګمارنه کې را باندې فشار اغېزه نه لری

د اداری اصلاحاتو او ملکی خدمتونو د کمېسیون رییس نادر نادری وایی : چې لا هم د ګمارنې او اداری اصلاحاتو په برخه کې د بدلون راوستلو په برخه کې د دولتی چارواکو تر فشار لاندې دی.ښاغلی نادری دغه خبره له امریکا غږ سره په مرکې کړې او ویلی یې دی ،چې د ګمارنې د سیستم په کمپیوټری کولو به تر ډېره د دغو لاسوهنو مخه ونیول شی. ښاغلی نادری ویلی ، چې له کلونو راهیسې هڅه کوی، چې خپلو مراجعینو ته د استخدام پروسه آسانه کړی او په ټولې پروسې کې د انسانانو پرځای له کمپیوټری سیستمه ګټه واخیستل شی.دی زیاتوی، چې د کمپیوټر په کارولو سره به له یوې خوا پروسه چټکه شی او له بلې خوا به د فساد مخنیوی وشی.نادری وایی : په تېرو دوو کلونو کې د اداری اصلاحاتو او ملکی خدمتونو کمېسیون ۵۱ زره کسان په دندو ګمارلی ، چې دغه کار په کمېسیون د خلکو اعتبار ډېر کړی دی. د فساد په اړه په افغانستان کې د امریکا د سفیر د څرګندونو په اړه د یوې پوښتنې په ځواب کې ښاغلی نادری وویل، چې افغان حکومت په تېرو څلورو کلونو کې د فساد د له منځه وړلو لپاره غټ ګامونه اخیستی او د فساد د شتون په اړه د بهرنیو بنسټونو د راپورونو په ځواب کې ولسمشر اشرف غنی وخت په وخت خپلې څرګندونې له خلکو سره شریکې کړی دی. په دولتی پوستونو کې د نویو کسانو د ګمارلو د پروسې په اړه ښاغلی نادری وویل، چې د ازموینې اخیستل او ارزول د کمپیوټر په مرسته کېږی او کمپیوټر ته د چا قومیت مطرح نه دی، یواځې لیاقت یې ګوری. ښاغلی نادری همداراز د اداری اصلاحاتو او ملکی خدمتونو له خوا د ملکی خدمتونو ټولو کارکوونکو د راجستر کولو په اړه خبر ورکړ او ویې ویل: دغه پروسه ۸۰ سلنه بشپړه شوې او هیله ده چې د روان لمریز کال تر پایه به پوره شی.

ممکن است شما دوست داشته باشید