روزنامه هیواد
ریاست روزنامه های دولتی افغانستان

محمد اشرف غنی: طالبان باید خلک وپوښتی چې سوله غواړی که تباهی

ولسمشر غنی د ثور د اتمې یا د مجاهدینو د بریا د ورځې په مناسبت خپاره کړی پیغام کې ویلی، افغانان جګړه نه بلکې سوله او خوشحالی غواړی.

ولسمشر غنی په دغه پیغام کې ویلی، سوله د افغانانو اصلی غوښتنه ده او دوی له جګړې او شرارت څخه کرکه لری او افغان حکومت به هم ولس ته د سولې راوستلو هڅې ونه سپموی.

ولسمشر ټینګار کړی ، چې طالبان باید د افغانستان له اصیلو بچیانو وپوښتی، چې دوی څه غواړی: (( زموږ د خلکو ځواب به طبعاً همدا وی چې د ټولې نړۍ د خلکو په څېر موږ هم جګړه او تباهی نه غواړو.))

ولسمشر ویلی، تېرو تحمیلی جګړو د افغانستان زېربناوی او اساسات له منځه وړی دی خو اوس افغان حکومت د سولې لپاره اساسی او عملی ګامونه پورته کړی دی: (( موږ په نوی پړاو کې یوازې په ملی یووالی له تحمیلی جګړې وتلی او سولې ته رسېدلی شو.))

ولسمشر د کورونایی وضعیت د مهار لپاره هم یو وار بیا د حکومت په لازمو تدابیرو ټینګار کړی او ویلی یې دی لکه څنګه چې د جهاد په وخت کې افغانان په یو صف ولاړ وو، داسې د کورونا پر ضد هم یو شان مبارزه کې ولاړ دی.

د ثور اتمه د مجاهدینو د بریا او د شوروی له ماتې سره سمون خوری چې ۲۸ کاله وړاندې د ۱۳۷۱ د ثور په اتمه مجاهدینو بری ترلاسه کړ، خو دغه ورځ وروسته بیا بیرته په یو خونړی کورنی جنګ بدله شوه.

 

ممکن است شما دوست داشته باشید