د هېواد ملی ورځپاڼه . په ۱۳۲۸ لمریز کال کې رامنځ ته شوه.. کله ،چې په دغه کال په پغمان کې د پښتنو او بلوڅو د پیوستون ورځ د شاندارو مراسمو په لړ کې نمانځل کېده ،نو پرېکړه وشوه ،چې هېواد ورځپاڼه هم را منځته شی .
د دې تاریخې اوملی ورځپاڼې بنسټ اېښودونکی عبدالرؤف بینوا ویلی: (( کله چې ما د هېواد ورځپاڼې بنسټ کېښود ،زوى مې پیداشو او پرهغه مې هم (( هېواد )) نوم کېښود )) د هېواد ورځپاڼې لومړى مسوول مدیر دوطن تکړه لیکوال اوشاعرخداى بخښلى محمد ارسلان سلیمی وردګ و،چې دوخت د مطبوعاتو د مستقل ریاست له خوا په دغې مهمه دنده وټاکل شو…په هغه وخت کې د هېواد ورځپاڼې کلیشه په سره رنګ چاپېده .
سیاسی څېرې کولای شی د امارت تر چتر لاندې هوسا ژوند وکړی
اسلامی امارت وایی، چې د هزاره قوم سیاسی څېرې ( کریم خلیلی، محمد محقق او صادق مدبر) یې بخښلی او هغوی هېواد ته د ژوند کولو لپاره راتلی شی.د دوی په اعلامیه کې راغلی، چې سیاسی مرستیال یې مولوی عبدالکبیر وړمه ورځ د هزاره قوم په استازیتوب سیدصوفی ګردیزی، شیخ کریمی بامیانی او سنګردوست وردګ سره لیدلی او هغوی په دې لیدنه کې د افغانستان له اسلامی امارت سره خپل ملاتړ څرګند کړی دی.د اسلامی امارت اعلامیه کې وېیل شوی، چې د هزاره قوم مشرانو د امریکایی اشغال خاتمه د اسلامی امارت معجزه وبلله، ځکه دوی نه غوښتل چې افغانستان یو ځل بیا د جنګ ډګر شی.هغوی زیاته کړه چې د اسلامی امارت او هزاره وو ترمنځ دې پر باور جوړولو کار وشی، ځکه له ګڼ شمېر شخصیتونو سره خبره شوې چې بېرته خپل هېواد ته راشی او د امارت تر چتر لاندې آرام او هوسا ژوند ته ادامه ورکړی.د طالبانو سیاسی مرستیال مولوی عبدالکبیر د هزاره قوم شخصیتونه لکه خلیلی، محقق او صادق مدبر د هېواد وګړی وبلل او په افغانستان کې یې اوسیدل د دوی مسلم حق یاد کړ، هغوی یې په عامه عفوه کې داخل وبلل او د امارت له لوری یې دوی ته ډاډ ورکړ چې هغوی ته به هېڅ خطر نه متوجه کېږی.