روزنامه هیواد
ریاست روزنامه های دولتی افغانستان

د چارو ادارې لوی رئیس: د قانون تطبیق او د فساد پرضد مبارزه مو لومړیتوب دی

د اسلامی امارت د چارو ادارې لوی رئیس مولوی احمد جان احمدی په کابل کې د یوناما دفتر د قانون د تطبیق څارنې له مسئولې مېرمن مونیکا مارتینز سره ولیدل.  په دغه لیدنه کې دواړو لوریو د قانون پر تطبیق او له فساد سره د مبارزې په تړاو خبرې وکړې.  د چارو ادارې لوی رئیس مولوی احمد جان احمدی مېرمن مارتینز ته وویل، چې د قانون تطبیق او د فساد له منځه وړل د اسلامی امارت د مهمو وجیبو څخه دی.  ښاغلی احمدی زیاته کړه: ((په ډاډ سره وایم، چې اسلامی امارت له فساده پاک دی، قانون پرته له استثنا په هر کس تطبیقېږی او د فساد له منځه وړلو ته ژمن یو. د کابینې له لوری د قانون د تطبیق کمېسیونونه جوړ شوی او حتی د بندیانو د دوسیو د څېړلو لپاره هم پلاوی ټاکل شوی، څو د هېچا حق ضایع نه شی.)) د ښاغلی احمدی په وینا، په تېرو څو میاشتو کې په کوچنۍ تخطۍ او سرغړونو اشخاص له دندو ګوښه شوی او محکمې ته معرفی شوی او د فساد په تړاو د اسلامی امارت تحمل صفر دی.  د چارو ادارې لوی رئیس د یوناما له استازی وغوښتل، چې نړیوالو ته د افغان ولس غږ ورسوی، ځکه وروسته له ۴۰ کلونو په هیواد کې واحد نظام حاکم شوی او موږ ته فساد، د نېشه یی توکو تولید ، ګڼ شمېر روږدی کسان او نور میراثونه پاتې دی.  په کابل کې د یوناما دفتر د قانون د تطبیق د څارنې مسئولې مېرمن مارتینز وویل: ((موږ دلته یو، چې د فساد پر وړاندې ګډه مبارزه وکړو او هڅه کوو، چې په اسلامی هېوادونو کې خپل فعالیتونه د اسلامی قوانینو مطابق عیار کړو.  د یوناما استازې وویل: موږ د مخکینی حکومت ادارو ته هم له فساد سره د مبارزې ستراتیژی ترتیب او چمتو کړې وه، خو په هغه اندازه چې مو تمه درلوده، عملی نه شوه. اوس وضعیت تغییر کړی،ومو غوښتل پوه شو، چې اسلامی امارت له موږ څه غوښتنې لری.  موږ په خپل راتلونکی راپور کې دا ځای کوو، چې اسلامی امارت واحد نظام دی، جګړه پای ته رسېدلې او اسلامی امارت سر له اوسه د فساد پر وړاندې مبارزه پیل کړې ده.  دا چې د فساد په تړاو د اسلامی امارت تحمل صفر دی، د ټولې نړۍ لپاره یو ښه بېلګه کېدای شی.

ممکن است شما دوست داشته باشید