د هېواد ملی ورځپاڼه . په ۱۳۲۸ لمریز کال کې رامنځ ته شوه.. کله ،چې په دغه کال په پغمان کې د پښتنو او بلوڅو د پیوستون ورځ د شاندارو مراسمو په لړ کې نمانځل کېده ،نو پرېکړه وشوه ،چې هېواد ورځپاڼه هم را منځته شی .
د دې تاریخې اوملی ورځپاڼې بنسټ اېښودونکی عبدالرؤف بینوا ویلی: (( کله چې ما د هېواد ورځپاڼې بنسټ کېښود ،زوى مې پیداشو او پرهغه مې هم (( هېواد )) نوم کېښود )) د هېواد ورځپاڼې لومړى مسوول مدیر دوطن تکړه لیکوال اوشاعرخداى بخښلى محمد ارسلان سلیمی وردګ و،چې دوخت د مطبوعاتو د مستقل ریاست له خوا په دغې مهمه دنده وټاکل شو…په هغه وخت کې د هېواد ورځپاڼې کلیشه په سره رنګ چاپېده .
د لویې څارنوالۍ لسګونه کار کوونکی د ادارې فساد په تور نیول شوی
د افغانستان لویه څارنوالی وایی: د تیر کال راپه دې خوا یې د دغه ادارې ۳۱ کار کوونکی د اداری فساد په تور نیولی دی.لویې څارنوالۍ پرون ویلی، چې په نیول شوو کسانو کې رییسان، څارنوالان او د لویې څارنوالۍ کار کوونکی شامل دی چې تر ډېره د رشوت اخیستلو په تور نیول شوی دی.د یادې ادارې په اعلامیه کې راغلی ،چې د لوی څارنوالۍ د کنټرول او مراقبت ریاست په ۱۳۹۸ کال کې ۲۸ قضیې څېړلی او پایلې یې عدلی او قضایی ارګانونو ته سپارل شوی دی.په اعلامیه کې راغلی : (( د دغه قضیو په تړاو ۳۹ تورن کسان نیول شوی، چې د هغوی په منځ کې ۲۴ یې رییسان، څارنوالان او د لوی څارنوالۍ کار کوونکی او ۱۵ نور یې د نورو ادارو کار کوونکی دی.))د دغه ادارې پر وینا د روان کال په لومړیو درې میاشتو کې ۱۱ نور د اداری فساد په تور نیول شوی چې له ډلې ۷ رییسان، څارنوالان او د لویې څارنوالۍ کار کوونکی دی او څلور یې د نورو ادارو کار کوونکی دی. بیان وایی، چې دغه کسان د ادارې فساد په ۱۰ قضیو کې د لاس لرلو په تور نیول شوی دی. دا په داسې حال کې ده چې د روان کال د غبرګولې پر ۲۹مه د اداری فساد سره د مبارزې په اړه د ملګروملتونو په نوی راپور کې په افغانستان کې د فساد سره د مبارزې په برخه کې دوامداره او اغېزمنې هڅې د دغه هېواد د راتلوونکی لپاره خورا مهمې ګڼل شوی او له افغان مشرانو غوښتل شوی و چې فساد سره مبارزې ته دې لومړیتوب ورکړی.په دغه راپور کې په افغانستان کې د فساد پر وړاندې مبارزه د افغانانو د راتلوونکی لپاره مهمه ګڼل شوې او ویل شوی، چې په دغه هېواد کې د اداری فساد پروړاندې پخوانۍ هڅې لاهم د ډېرو افغانانو په ژوند مثبته اغېزه نه ده کړې.