د هېواد ملی ورځپاڼه . په ۱۳۲۸ لمریز کال کې رامنځ ته شوه.. کله ،چې په دغه کال په پغمان کې د پښتنو او بلوڅو د پیوستون ورځ د شاندارو مراسمو په لړ کې نمانځل کېده ،نو پرېکړه وشوه ،چې هېواد ورځپاڼه هم را منځته شی .
د دې تاریخې اوملی ورځپاڼې بنسټ اېښودونکی عبدالرؤف بینوا ویلی: (( کله چې ما د هېواد ورځپاڼې بنسټ کېښود ،زوى مې پیداشو او پرهغه مې هم (( هېواد )) نوم کېښود )) د هېواد ورځپاڼې لومړى مسوول مدیر دوطن تکړه لیکوال اوشاعرخداى بخښلى محمد ارسلان سلیمی وردګ و،چې دوخت د مطبوعاتو د مستقل ریاست له خوا په دغې مهمه دنده وټاکل شو…په هغه وخت کې د هېواد ورځپاڼې کلیشه په سره رنګ چاپېده .
د حکومت د رهبرۍ غونډې پرېکړه وکړه چې له قزاقستان څخه دې ۷۰ زره ټنه غنم وپېرل شی
د افغانستان د اسلامی جمهوریت جمهوررییس محمد اشرف غنی په مشرۍ پرون غرمه د حکومت د رهبرۍ غونډه وشوه به دې غونډه کې، د سوداګرۍ او اقتصادی چارو د پراختیا او بې وزلو راکمولو په برخه کې د جمهوررییس ځانګړی استازی محمد یوسف غنضفر ته دنده وسپارل شوه چې د صنعت او سوداګرۍ او مالیې وزارتونو سره په همغږۍ له قزاقستان څخه د ۷۰ زره ټنه غنمو د پېرلو اقدام وکړی.دغه راز د جمهوری ریاست عالی مقام دفتر عمومی رییس محمد شاکر کارګر غونډې ته راپور ورکړ چې قزاقستان چمتو دی په افغانستان ۵۰۰ کیلو ولټ برېښنا وپلوری. د صنعت او سوداګرۍ او مالیې وزارتونو ته دنده وسپارل شوه چې د دې د عملی اړخونو لپاره پلان ترتیب کړی.همداراز د صنعت او سوداګرۍ وزیر په ژمی کې د تېلو کمښت مخنیوی لپاره خپل مشخص وړاندیزونه غونډې ته وړاندې کړل چې تائید شول او نوموړی ته لارښوونه وشوه چې په دې برخه کې عملی اقدامات پیل کړی.