روزنامه هیواد
ریاست روزنامه های دولتی افغانستان

افغانستان له روسیې د تېلو او خوراکی توکو په برخه کې همکاری غوښتې

د افغانستان د سوداګرۍ او پانګونې خونې چارواکو له روسی سوداګرو افغانستان ته د نفتی او خوراکی توکو د وارداتو او صادراتو په برخه کې د همکارۍ غوښتنه کړې ده. د سوداګرۍ خونې چارواکو دغه غوښتنه له یو شمېر روسی سوداګرو سره په لیدنه کې مطرح کړې ده. د سوداګرۍ خونې د غبرګولی په ۲۹ مه خپره کړې خبرپاڼه کې ویلی، چې د یادې خونې چارواکو د کریمیا په چارو کې د روسیې د ولسمشر له ځانګړی استازی سره په ورته مسایلو خبرې کړې دی. په خبرپاڼه کې ویل شوی، افغان پلاوی د اوړو، غنمو، غوړیو، او نفتی موادو د وارداتو او صادراتو په برخه کې له مقابل لوری د همکارۍ غوښتنه کړې. د سرچینې په وینا :افغان پلاوی ته روسی سوداګرو او چارواکو د سوداګرۍ په برخه کې د ټولو آسانتیاوو د رامنځته کېدو ژمنه ورکړې او په راتلونکې کې یې د ورته لیدنو پرکېدو هم ټینګار کړی. دا په داسې حال کې ده، چې څو ورځې وړاندې د روسیې ولسمشر ولادیمیر پوتین هم امر کړی و، چې له افغانستان سره دې د غلو دانو رسولو په برخه کې همکاری وشی.

ممکن است شما دوست داشته باشید