په هلمند کې د کولرا ناروغۍ له امله ۲۰ کسان مړه شوی

خبرونه وایی، چې په وروستیوو څو ورځو کې په هلمند کې د کولرا ناروغۍ له امله ۲۰ کسان مړه شوی دی.

د هلمند ولایت د عامې روغتیا ریاست وایی، په باغران ولسوالۍ کې په کولرا ناروغۍ د اخته کسانو شمېر لا معلوم نه دی، خو د دغه ریاست د لومړنیوو مالوماتو له مخې ۱۸ تنه له دې ناروغۍ مړه شوی دی.

د دغه ولایت د عامې روغتیا رییس ډاکتر سید احمد سعید وېیلی: “پخوانی مرکزونه شته او موږ ورته دری څلور نور هم جوړ کړی دی. درمل او شاوخوا ۳ ډاکتر په سیمه کې شته دی..”

د نوموړی په خبره، اوس سیمه تر کنترول لاندې ده او هڅه کېږی، چې دغه ناروغۍ نورو سیمو ته خپره نه شی.

نوموړی وایی، په مړه شویو ماشومان، ښځې او لویان هم شامل دی.

خو د باختر اژانس د خبر له مخې د هلمند ولایت په باغران ولسوالۍ کې د کولرا ناروغۍ له امله د مړو شویو شمېر ۲۰ کسه ښودل شوی دی.

باختر اژانس لیکلی، چې ډېر کسان په دغه ناروغۍ اخته شوی، خو د هلمند ولایت د عامې روغتیا ریاست بیا وایی چې د اخته شویو کسانو شمېر لا مشخص شوی نه دی.

د هلمند ولایت د باغران سیمې اوسېدونکی وضعیت د اندېښنې وړ بولی.

د یادونې ده، چې له دې وړاندې د افغانستان په سویل پکتیکا او خوست کې هم په زلزله ځپلو سیمو کې هم د کولرا ناروغۍ د خپرېدو راپورونه ورکړل شوی وو.