روزنامه ملی انیس
ریاست روزنامه های دولتی افغانستان

په لاس وهنو موخی نه شی ترلاسه کیدای

په هیواد کی د روانی  راتپل شوی جګړی څرنګوالی او د جرړ د راسپړنی په هکله د هر ورځی په تیریدو سره د لمسونکو لاس وهنه رابربڼډیږی او د افغان چارواکو ادعاوی په رښتینتوب بدلون مومی. ځکه چی زموږ په هیواد کی د روانی جګړی جرړی په پاکستان کی راټوکیږی او له هغه ځایه زموږ په هیواد کی د مرګ ژوبلی او ورانی له پاره د پاکستان د څارګری اداری له خوا لمسول شویو ترهګرو ډلو ته پلان ورکول کیږی او بیا زموږ هیوادته د مرګ ژوبلی له پاره رالیږل کیږی.

نړیوال او هیوادوال پوهیدلی چی د ترهګرو ځالی په پاکستان کی دی او پاکستان د خپلو ناوړه موخو د ترلاسه کولو له پاره د هیڅ ډول ناوړه هڅو څخه دریغ نه کوی کله په یوه نامه او کله په بل نامه زموږ په هیواد کی د جګړی اور ته لمن وهی او د هیواد د ورانی څخه لاس نه اخلی. نو ځکه په وار وار په نړیوالو غوڼډوکی د افغان دولت مشرتابه په هیواد کی د پاکستان د لاس وهنی ناوړه سیاست ته په کتو سره نړیوال هڅولی چی په پاکستان کی د ترهګرو ډلو پټن ځایونه چی نه تنها افغان دولت ته ګواښ ګڼل کیږی بلکی د سیمی او نړی له پاره هم د ګواښ او ویری اچونی لامل ګرځی. ځکه چی ترهګر پولی نه پیژنی کیدای شی چی ددی ترهګریزی جګړی دګواښ لمن نورو ګاونډیو هیوادوته وغزل شی. خو پاکستان چی د دوه مخی او مکرجن سیاست څخه په کار اخستنی سره وتوانیده د نړیوالو په ځانګړی توګه د امریکا او د هغوی د انډیوالانو څخه په ډیره هوښیاری سره ترهګرییزی جګړی په ضد ځان شریک وګڼی او له دی لاری زیاتی مرستی او امتیازونه ترلاسه کړی چی دا کار یی د امریکا د متحده ایالاتو د جمهور رئیس اوباما تروریستی واکمنی یوری دوام ورکړو. خو کله چی د امریکا په واکمنی کی بدلون رامنځ ته شو او په افغانستان کی د جګړی د اوږدیدو او د امریکایی پوځیانو د مرګ  ژوبلی په هکله فکر وکړو نو اړ شول چی په خپله تیره ستراتیژی کی بدلون راولی او د یوی ژوری او هر اړخیزی ارزونی او څیړنی له مخی وتوانیږی چی د جګړی په پوره څر نګوالی وپوهیږی او د جګړی د راټوکیدو پرځای ذګی فکر وکړی.

امریکایی لوړپوړو چارواکو ته جوته شوه چی ترهګر چیرته روزل کیږی او د څه له پاره یی افغانستان ته د جګړی له پاره رالیږی. همدا وجه وه چی ولسمشر دونالد ترامپ د نوی ستراتیژی پربنسټ د پاکستان سره په ورکړل شویو مرستو او داړیکو په پیوند بیا کتنه وکړه او له پاکستانه یی وغوښتل چی د ترهګرو پټن ځایونه له مینځه یووسی او د ترهګړو ډلو د تمویل او تجهیز څخه لاس واخلی ګنی د امریکا له مرستو څخه به برخمن نه شی پاکستان چی د تیر په څیر د غولونکی سیاست څخه کار اخسته وی نه غوښتل چی د ترهګرو روزنیز مرکزونه بند کړی ځکه هغوی د ترهګرو په وسله په سیمه او نړی کی خپل شوم هدفونه لټوی نه غواړی چی دغه ارزانه ملیشه له لاسه ورکړی. نو له دی امله د امریکا او پاکستان اړیکی پکه او بی خونده شوی. خو اوس چی د پاکستان په واکمن عمران خان تیرو واکمنانو پر سیاست د نیوکی او نیمګړتیا څرګندونی رابرسیره کړی تمه ده چی خبری او عمل یو شان شی تر څو په سیمه او نړی کی د ترهګرو د ګواښ لمن ټوله شی.

د پاکستان لومړی وزیر عمران خان چی د بهرنیو اړیکو کونسل په نامه څیړنیزی اداری سره په غونډه کی وویل: د پاکستان استخباراتی شبکی آی اس آی د القاعده ډلی د وسله والو په ګډون ټول هغه وسله وال روزلی چی دده په خبره په افغانستان کی یی جګړه کوله. د عمران خان د اعتراف خبری په داسی وخت کی راڅرګندیږی چی د امریکا او مخالفو وسله والو طالبانو ترمنځ خبری په ټپه دریدلی او ترامپ ګوت څڼډنه کړی چی په افغانستان کی د ثبات په اړه د ډاډ د ترلاسه کولو له پاره به متحده ایالات د خپلو افغان شریکانو سره همکاری ته دوام ورکوی و به لیدل شی چی د پاکستان لومړی وزیر تیرو لاس وهونکو کړنو ته په کتو سره په راتلونکی کی څومره بدلون راوستی شی آیا د پاکستان د استخباراتی کړیو څخه څومره په خپلواکه توګه د چارو سمبالښت پر مخ وړی شی او کنه خو مناسبه او غوره به داوی چی عمران خان که غواړی چی په سیمه کی امنیت ټینګښت ومومی او د هیوادونو ترمنځ د باور فضا رامنځ ته شی نو شونی ده چی په سیمه کی میشت وګړی د نورو پرمختلو هیوادو په څیر د هوساینی او د ژوند د آسانتیاو څخه برخمن شی ځکه د پرمختګ او لاس ته راوړنو له پاره سوله او سوکالی اړینه ده نو هیله ده چی عمران خان د تیرو واکمنانو په څیر تیروتنه ونه کړی او هغه لاری ولټوی چی د پرمختګ او هوساینی اوږدمهاله لار رالڼډوی.

هارون

ممکن است شما دوست داشته باشید