د تصفیې د کمیسیون له خوا په هیواد کی دوه زره شپږ سوه فرصت طلب اشخاص ایستل شوی

د هلمند ولایت مقام لخوا د جنوبی او مرکزی ولسوالیو د دوهم ځل نظارت په موخه ټاکل سوی هیئت د خانشین ولسوالۍ له اوسېدونکو، علماء کرامو او مجاهدینو سره ناسته وکړل:

د هلمند ولایت مقام لخوا د جنوبی او مرکزی ولسوالیو د حالاتو د ارزولو لپاره ټاکل شوی پلاوی د خپل سفرونو په جریان کی د دېشو ولسوالۍ د نظارت تر بشپړېدو وروسته خانشین ولسوالۍ ته ورسېدی.

یاد هیئت د مولوی شریف په مشرۍ د خانشین ولسوالۍ له اوسېدونکو، علماء کرامو او مجاهدینو سره غونډه وکړل.

د غونډی پیل د قاری مسلم لخوا د قرآنکریم د څو مبارکو آیاتونو په تلاوت وشو.

 وروسته د هیئت سره مل یو تن دینی عالم شیخ مولوی خپل ارزښتناکه وینا د غونډی ګډونوالو ته واورول.

نوموړی د غونډی ګډونوالو په خاص ډول مجاهدینو ته شرعی لارښوونی وکړې له مجاهدینو یې وغوښتل چی له ولس سره ښه چلند وکړی د ولس زړونه خپل کړی او د اړتیا په وخت کی په سر او مال د خپل ولس مرسته او دفاع وکړی او همدارنګه یې د یادی ولسوالۍ له مسؤلینو وغوښتل چی د خلګو ترمنځ د شرعی قوانینو مطابق فیصلې وکړی، همداراز نوموړی د خانشین ولسوالۍ له اوسېدونکو مننه وکړل چی د اشغال په وړاندی یې له مجاهدینو سره هر ډول همکاری کړې ده او زیاته یې کړه چی د خانشین د مجاهد ولس سرښندنی او قربانۍ به هیڅکله هیری نشی، ده وویل: موږ دلته ستاسی د مشکلاتو او غوښتنو د اورېدو لپاره راغلی یو ستاسی ټولی ستونزی او غوښتنی به حتمی تر ولایتی ادارې پوری رسوو.

وروسته د یاد هیئت مشرتابه شریف مولوی خپله ارزښتناکه وینا د غونډی ګډونوالو ته واورول نوموړی د صفونو د تصفیې د کمیسون لخوا د ایستل شوو نامطلوبو اشخاصو په اړه د غونډی ګډونوالو ته مالومات ورکړل.

ده وویل چی د صفونو د تصفیې د کمیسیون له خوا په هیواد کی د کار له پیل څخه تراوسه ۲۶۰۰ دوه زره شپږ سوه نامطلوب، شریر او فاسد اشخاص ایستل شوی دی نوموړی د خانشین ولسوالۍ له اوسېدونکو او مسؤلینو وغوښتل چی د صفونو د تصفیې کمیسیون ته هغه کسان ور وپېژنی چی د مجاهدینو له نامه غلطه استفاده کوی، قومی او ژبنی تعصب ته لمن وهی او په ناوړه او نا مشروع کارونو کی لاس ولری.

وروسته د غونډی په جریان کی د یاد هیئت څخه د هلمند د امنیه قومندانۍ استازی مفتی صاحب وینا وکړه او د خانشین ولسوالۍ له مسؤلینو یې وغوښتل چی د هلمند ولایت مقام د هدایت په اساس مجاهدینو ته د شیخانو او عالمانو په مرسته د مجاهدینو د اصلاح او تربیې لپاره سمینارونه جوړکړئ.

ورپسې د ګډ پلاوی څخه د محاکمو استازی غازی مولوی وینا وکړه د غونډی د ګډونوالو ستونزی، غوښتنی او دعوې یې واورېدلی.

وروسته د خانشین ولسوالۍ اوسېدونکو، مسؤلینو، مجاهدینو او علماء کرامو خپلی ستونزی او غوښتنی له یاد هیئت سره شریکی کړې او دهغوی څخه یې هیله وکړه چی ستونزی یې د حل په موخه تر اړونده ادارو پوری ورسوی.

د یاد هیئت له خوا د خانشین اوسېدونکو، مسؤلینو، مجاهدینو او علماء کرامو ته پوره اطمنان ورکړل شو چی د دوی ټول مشکلات او غوښتنی به د حل په موخه تر ولایتی ادارې پوری رسوی.

غونډه په دعائیه سره پای ته ورسېده.