دخوست په ولایتی روغتون کې پی، سی، آر ماشین ګټې اخیستنې ته وسپارل شو

پدې اړه جوړه شوی غونډه کې خوست والی مولوی محمد نبی عمری، د عامې روغتیا سرپرست رئیس صاحب ګل خالد، د عامې روغتیا اړوند همکارو موسساتومسولینو، روغتیاپلانو او خصوصی سکتور مسؤلینو او د مختلفو اداراتو استازو ګډون کړی و.

خوست والی مولوی محمد نبی عمری وویل, نن ورځ د WHO په مالی همکارۍ د پی سی آر ماشین  د یو لک پنځوس زره امریکایی ډالرو په لګښت فعال او د نوموړی ماشین لپاره ځانګړی ځای ترمیم او دا دی ګټې اخیستنې ته سپارل کیږی.

ښاغلی عمری زیاته کړه,چې یاد ماشین د نړۍ له پرمختللیو او عصری ماشینونو له جملې څخه دی, چې د مختلفو امراضو تشخیص معاینات په ډېر کم وخت او دقیقه توګه ترسره کوی.

د ولایت والی وویل؛ د افغانستان ا. ا ژمن دی, چې د عامې روغتیا سکتور په برخه کې به وړ اصلاحات رامنځته او ولسونو ته به د روغتیا په برخه کې وړ خدمات عرضه شی.

نوموړی د عامې روغتیا مسؤلینو او همکارو موسساتو څخه د کړیو خدماتو مننه وکړه او له دوی یې غوښتنه وکړه, چې د عامې روغتیا ریاست سره په ګډه د روغتیا په برخه کې د خوست مېشتو غوښتنو ته رسیدګی وکړی.

د عامې روغتیا سرپرست رئیس صاحب ګل خالد پخپلو خبرو کې وویل, چې یاد ماشین څلرویشتو ساعتونو کې د ۱۵۰ ټیسټونو د ترسره وی ظرفیت لری.

د نوموړی په خبره د پی، سی، آر ماشین د کرونا ټیسټونو سربېره, د HIV,HCV,HBS او دې ته ورته نورو ویرسونو د تشخیص وړتیا لری.