کرنې وزارت د بزګرانو او مالدارانو په ژوند کې د مثبت بدلون لپاره ګړندۍ هڅې پیل کړې

د کرنې وزارت سرپرست د ملګرو ملتونو د خوړو او کرنې ادارې له رییس سره په کتنه کې وویل چې دغه وزارت د بزګرانو او مالدارانو په ژوند کې د مثبت بدلون د رامنځته کېدو په موخه يې ګړندۍ هڅې پیل کړې دي.

د کرنې، اوبولګولو او مالدارۍ وزارت سرپرست مولوي عطا‌ءالله عمري پرون په افغانستان کې د ملګرو ملتونو د خوړو او کرنې ادارې(FAO)  له رییس ریچارډ ټرانچارډ سره وکتل.

دواړو لوریو په افغانستان کې د کرنې، مالدارۍ او اوبولګولو د پراختیا په موخه د ګډو چارو او فعالیتو پر همغږۍ  او ترسره کولو خبرې اترې وکړې.

د کرنې وزارت سرپرست مولوي عطاء الله عمري د افغانستان له کروندګرو او مالدارانو سره د ملګرو ملتونو د خوړو او کرنې ادارې د هڅو او ملاتړ قدرداني وکړه او ویې ویل، چې د کرنیزو اصلاح شویو تخمونو، کیمیاوي سرو او د څارویو خوراکي توکو د وېش په برخه کې هڅې يې د پام وړ دي.

عمري د څارویو د نسل اصلاح، د اوبو لګولو د کانالونو په جوړولو، د څارویو د خوړو د برابرولو، د ملخانو له یرغل سره د مبارزې، د اصلاح شویو تخمونو د وېش زیاتوالي، د طبیعي زېرمو ساتنې په ځانګړې توګه ځنګلونه او د لبنیاتو د پروسس فابریکې جوړولو ته د دې ادارې د لا زیاتې پاملرنې غوښتنه وکړه.

د کرنې، اوبو لګولو او مالدارۍ وزارت سرپرست همدارنګه ډاډ ورکړ، چې د بزګرانو او مالدارانو په ژوند کې د مثبت بدلون د رامنځته کېدو په موخه يې ګړندۍ هڅې پیل کړې دي.

په ورته وخت کې، د ملګرو ملتونو د خوړو او کرنې ادارې رئيس ریچارډ ټریچارډ  په دغه کتنه کې د کروندګرو او بڼوالو سره د همکارۍ په موخه د ملګرو ملتونو د خوړو او کرنې ادارې پر ژمنتیا خبرې وکړې او ویې ویل: ( سږ کال په پام کې لرو، چې د غنمو ۳۱ زره متریک ټنه د غنمو اصلاح شوي تخمونه په بزګرانو ووېشو، همدا ډول د څارویو د خوراکي توکو او د سبو تخمونو وېش د هغو مرستو یوه برخه ده، چې د وچکالۍ له امله زیانمنو د سبو کروندګرو او بزګرانو سره مرستې کوو).

نوموړي له بېلابېلو نړیوالو بنسټونو او موسسو سره د خپل سفر او خبرو په اړه خبرې وکړې او ویې ویل، ډېری نړیوال بنسټونه د افغانستان له کروندګرو او مالدارو کورنیو سره همکارۍ ته لېواله دي او دوی دې برخې ته ډېر ارزښت ورکوي.

د یادونې وړ ده، چې د ملګرو ملتونو د خوړو او کرنې اداره (FAO) د کرنې له وزارت سره یو له همکارو بنسټونو څخه ده، چې له بزګرانو او بڼوالو سره یې په بېلابېلو برخو کې مرستې کړې او دا لړۍ لا هم دوام لري.