چوع پنورں لسته که شته نچاسته مښ اوتا وارسته پوت ښټاںالی اسه

ایموسته ګول تں اینه دری ولتں اوجوپچوعه دولتی جےسوره منچاں سته اینه پی پی اسه کی ګول تں پعسکره وارجے دمکال تں تتی بلیوک اونګته وتعه ایموسته ګول وعیں تں پمیوک اڅتت کی، اینه بګانه لسته که ایموسته ګول تں منچاں سته اوبجیک جے امیکاں سته اتج بں سته کی اسه باسته تں لسته لی وارسته پوت ښټاں الی بګانه پوت کیوت کوتمیش کی تی څنګں یاکں ښی پټال ویتت چے ایکی کودیوم ایموسته ګول تں لسته که پمیوک ګالا کی که ولسته بوتت.

لسته که اوش کعبا چوع پنورں سته اوبجیک کی اسه باسته تں ایموسته ګول وعیں آړه امشیں پارستع دی اوتا موټه وارسته سبب بوتت چی سته اینه اسه کی ال ننوعیں سته پوت وعاں ای باسته لتں لسته که برں کار کوسته نه بوته اینه تں تتی کیوع کیوع ډګروار ایموسته ګول وعیں تں پمیوک ایسه چی  امکیاں تع دی ګول تں سکال پعسکره وار اسه چی ایکی تں تتی ایموسته بلیوک ګول وعیں اوښی بوسته سبب دی بیسه.

لسته که پتیان مښ اینه وری وللـں بتمیش چے اوجوپچوع وښوار جےادګوار لی امکی اوګع اماں تں بول اسه ګجےسته اوګع اماں کلی لسته شته چےپاک چوع پنورں اوبجیک کول بیبا ایکی پکع امکی اوګع اماں کلی جےامشیں سته چوع پنورں اوبجیک تں لسته که پام نں کول بیبا سته منا چےکټوع اټپعی اشترں وءشیں لسته که شته نں نچاله بیبا امکی اوګعم پنع کیوع کیوع نں وښ جےاوښی وار مښ میوکه میوک بول آی اګجاع می ایموسته اسلام سته دین منچاں سته وښوار جے ادګووار تں لی سکال پام کع سه اګجاع می ایموسته اسلام سته شته کشیردین څنګں مول چون تع شته بوسته ایمان تع ڃمه ی سه اینه پام تں دمه تی امؤمن منچی کں ایچل اسه اموسته چوع پنورں سنه مناں اشتره وءیش کټیواټپع ی سوره کوواوتیں نشیں کول آی با امکیاں لسته که شته نچالا. پمو اتوجےاموتں بره له اوچپورپو توڅنګں پوت ګیټ بوں جے زیم اګاں تں مښ یں ښونی بوسته تع یاسته شیوں بدیوع کوله کدی کع با ایموں اینه بټه تں ایموسته شهر جے شال ګعام تں وعں تمیش چےآړ پنع اینه ابل تں آی چےامشیں کں اوپسی سته کں ښے اتوکوسته اموں ایپه تی امواولسته که ښنګره تی سکال لتری اینه بټه تں مصرف که تی امشیں سته بدو پوت تں کی وری اسه که نں ووشته تت آړ ته اینه تں می آی چے امشیں انسانی څیټ دی به اوتی پوتواتلاتت چے ایکی مښ نں پنع امکی ډګرګون کښاتت بلکه پوت ال دی امکیا سته ایکی دګر وار وع تی امکی اموایپالاں کں لعنت وله تت چےامشیں کع با ایکی کودیوم دش نشیں اسه ته بټه تں سکال دوی سناته اینه بټه تں امکی منچاں مښ پته تی دولت بلیوک بی پروای مښ کودیوم پمیوک ګاته ښټل وری ته اینه اسه ایموسته اسلام  سته شته کشیردین بدشیره څنګ دین مرتبه جے ګنوا وا تں لی اوتادین اسه ال ننوعیں سته بنده ښټلی پوت تں پاروللا سته بټه تں څنګ دین تع پولسه تی صفای جے شته که پاک بوسته بټه تں سکال تلول کراته بدشیره دین تں ګجےدین دی ایموسته اسلام سته شته کشیردین چارں منچاں کیوع کیوع دګر وار تع بدیوع بوسته کں نں وللاتت اګجاع می ال ننوعیں اموسته څنګ نع لی زعی لی ښوپعله محمد صلی الله علیه وسلم تں اموسته نوشتروی وحی تں څنګ اوتاموټه مښ پته تی موں چون بوسته تع بدیوع بوسته کں پکراته آګجاع می ال ننوعیں ګجےکوته ( توسته سنه منا شته نچاڅنګ مول چون وعکیں بوتت نیں ټکاں ګوسته بوتت با امکیاں تع بدیوع بو ) ال ننوعیں ایکی په دماں وع دی وع تی اینه بټه تں سکال پټیار اوتی نسته آی لسته که ال ننوعیں په دمی پوت تں نں په أتت ایکی ډګر وار تں تتی ښترک ایموسته ګول کویں سته کی شنګریک جےاوتاوار وی اسی باپمیج ستع ګوسه کیوع کیوع لتری تع کویدوم اونګه سته مښ ګول سته دش پع سکره بوتی یاچاکں نشیں ام أته کی !انسانی څیټ به اوتی پوت اتلاسته مښ تپه تی پمو اتووعی آوپوت تں پاربه أسته مښ پوت تں پته تی یونں بوسته مښ دش نشیں أته چوع پنوره اوبجیک تں سکال اوتاموټه وار پمیج أوته چےکیوع کیوع بع زه جےاوښی وار کں پوت ښټاته  کدی کع با امنی کودیوم مښ دش سکال نشیں أسته تں تتی اکسیجن دی کښع بوتی کیوع کیورر نں وښ کں پوت ښټاته دګر ښګین بول ته. اینه اسه ایموسته ګول تں اینه سمه وعں دمکال تں تی ایکی مښپته تی منچاں یاسته چوع پنورں اوبجیک تں سته که پام نں کع سته تں تتی ایموسته ګول تں کیوع کیوع بع زه تں منچی اتیوں ګوسته آي اګرایموسته منچاں ال ننوعیں سته پوت وعاں تں په ګه تی یاسته چوع پنوره شته نچی با اچاک دی پولسه تی یاسته جیت کنه سنه منا کټیوع اټپع اشترں وع شیں لسته که شته نچی با شک نیں کیوع کیوع بعزاں تع بدیوع بوں بل آی لی ښګین بول ته اینه اسه چےایموسته ګول تں سوره دولتی اداره مښ پته تی چوع پنورں شته نچاسته مستقل اداره دی واسمیش چےسته ابل کوته چے چوع پنوره شته نچاسته بټه تں منچاں مښ ارنګه ګول سته دش لسته بوله جےچوع پنوره اوبجیک کیوع کیوع ډګر وار تع بدیوع بوله بګانه ابل کوته ښټل وری ته اینه اسه ایموسته اسلام سته دین اینه بټه تں کی ! دش شته نچاسته بټه تں منچی سکال تلول کرر سته آی اچاک دی پولسه تی ګول پټل کوسته جےنینیل نچاسته بټه تں منچاں تلول کراسته سکال احادیث ایموسته اسلام سته څنګں تع ال ننوعیں تں تورں لی ښوپع له محمدصلی الله پارستع ایموتں وکراسته بیسمیش.

چےامکیاں تع اودی اینه اسه کی ګجےکوته کچی منچی أکنچیک تع ی باستاتع کی ستاسته کژوچ تع انسان، عمیک ، وعں دی حیوانات جےشتوا کیورواں یع با دی ثواب سته کنڃیک تله ال ننوعیں ثواب پعته . اینه موزعیں ګول پټل کوسته جےګول ښنګراسته بته تں منچاں تلول کراسته اسه ایموں آجیسته لی ښوجےلی تلول ګجےدین جےقانون تں وعنں بتمیش پنع اسلام سته دین می اسه چے منچی آجیست لے وار تں پار کں وللی سته آی کدی کع با ال ننوعیں اینه لسته که زعیں وری اسه چےشته دش جےشته چوع پنوره سکال ډګر وار سته میوک دمل آی که وښواسته بټه تں سکال دوی سنال آی مطلق کناں تسته می سکال فضیلت واکودیوم اسه. کدی کع با سته کنا پکعونشی ویکیه سته مښ ادګوار بدوی اشی سته مښ سته کناں تل منچی تں ثواب پعاته ګول پټل کوسته کناں تسته پنع دش شته بوسته تں می دوی نں سناته بلکه ورں دی طبیعی آفات تع منچاں لساته کی پښکوری طوفان ورں دی آفات تع منچی بدیوع بوتت آګجاع امنی وری پام تں دمسته مښ ایموسته مسلمان ګول وعیں سته ګنوا جےلی بتات اینه بولا چےیاسته ګول پټل کول بټه تں ابل کوموں کدی کع با ایکی مښ ارال ته کیوع کیوع مکروب جےډګراں تع بدیوع بوں موں چےښوار سته بټّ تں اوتاموټه وار پمیوک اوتت سورال ګول سته ښګرایک مښ پته تی کیوع ډګروار تع یدیوع بوموں . ایموسته ګول وعیں اینه لسته که پورجیله کی ایموسته ګول تں لی وارکدی سوره ډګرارپمیوک اڅه تت با امکی څنګں ایموسته ګول وعیں لسته که یاسته کودیوم تں برں کارنه کعسته تں تتی اسه اینه بګانه لسته اینه بولا کی ایموسته ګول تں لی وارسته شتان ایموسته ګول وعیں سته کی اسه باسته بګانه لسته که برں کارکتی اوتاوارسته پوت یاسته اوبجیک جےیاسته ګول وعیں کں پمیوک اڅله بګانه برں کارکتی یاسته کودیوم پمیوک ګاموں.