د لوړو زدهکړو وزارت له لوري د ((علياباد)) تدريسي روغتون کې پرون د داخلي ناروغيو د درملنې او سرطان جراحي نوي مرکز پرانيستل شو.د عليآباد تدريسي روغتون رئيس عبدالمطب شينواري په دې اړه جوړو شويو مراسمو ته د وينا پر مهال وويل، چې دغه روغتيايي مرکز د روغتيا نړيوال سازمان، د سره صليب کمېټې او لوړو زدهکړو وزارت لهخوا جوړ شوی دی.ده وويل: (( د داخلې درملنې او سرطان جراحي مرکز د روغتيا نړيوال سازمان، سره صليب کمېټې، او دلوړو زدهکړو وزارت په همکاري جوړ شوي ،چې ۲۰ميليونه افغانۍ لګښت پرې راغلي او ۴۰بستره لري.)) په ورته مهال د لوړو زدهکړو وزارت مسئولانو په ياده ناسته کې له هغو متخصصو ډاکټرانو، چې له هيواده بهر تللي، غوښتنه وکړه ،چې بېرته هېواد ته راستانه او هيوادوالو ته د معياري درملنې زمينه برابره کړي. د لوړو زدهکړو وزارت سرپرست ندامحمد نديم همداراز له نړيوالو بنسټونو غوښتنه وکړه ،چې افغانستان سره د روغتيا برخې معياري کولو برخه کې همکاري وکړي.ده وويل: (( د سرطان وړانګې مرکز بوديجه د کابينې له لوري تصويب شوې او ټاکل شوې ،چې ډېر ژر يې عملي چارې پيل شي. موږ له نړيوالو بنسټونو غوښتنه کوو، چې افغانستان سره د روغتيا سکتور معياري کولو برخه کې همکاري وکړي.))بلهخوا پر سرطان ناروغي اخته يوشمېر ناروغان د ياد مرکز له پرانېستلو هرکلي کوي او وايي: هيله لري چې دغه مرکز کې يې درملنه وشي.۶۴کلن اکرامالدين چې پر سرطان ناروغي اخته دی او د علي آباد روغتون کې بستر دی، وايي : د بېوزلي له امله نشي کولای بهر ته د درملنې لپاره لاړ شي.ده وويل: ((زه هيلهمند يم چې دې روغتون کې مې درملنه وشي، بهر ته نشم تللی، ځکه بېوزله يم او پيسې راسره نشته، خو بيا هم دې مرکز کې د ځان د درملنې هيله لرم.))دا مهال د سرطاني ناروغيو د تشخيص او درملنې يوازې درې مرکزونه په کابل، کندهار او هرات ولايتونو کې فعال دي. د روغتيا نړيوال سازمان د معلوماتو پر بنسټ، تېر کال افغانستان کې د سرطان ۲۳زره پېښې ثبت شوې وې چې له ډلې يې ۱۶زره کسانو خپل ژوند له لاسه ورکړی و.
