د افغانستان اسلامي امارت د رياستالوزرا اقتصادي مرستيال ملا عبدالغني برادر آخوند، د کابينې يو شمېر غړيو او نورو مسئولينو پرون د «شهر نو» پارک د بیارغونې پروژې پرانيسته وکړه.د باختر آژانس خبریال د خبر له مخې؛ په کابل کې په همدې مناسبت جوړې شوې غونډې ته د صنعت او سوداګرۍ وزارت سرپرست نورالدین عزیزي وویل: له ژورو تحولاتو او د اسلامي امارت له راتګ وروسته، تر هر وخت ښه د پانګونې او د هېواد د آبادۍ لپاره زمینه برابره شوې ده او د افغان ملت هیلې به په واقعیت بدلې شي.عزیزي زیاته کړه چې د اسلامي امارت مسئولین د ملت په همکارۍ او همغږۍ، تل هڅې کوي چې د افغانستان د توسعې او آبادۍ لپاره له مناسبو لارو چارو او فرصتونو څخه استفاده وکړي.هغه له ټولو اړوندو دولتي ادارو او قراردادي شرکت څخه چې د دې مهمې پروژې د تطبیق او د پانګونې د راجلبولو په لاره کې هڅې کړې دي؛ مننه وکړه.دغه راز د ښار جوړولو او ځمکو وزارت سرپرست مولوي حمدالله نعماني، د «شهر نو» پارک د بیارغولو پر اړتیا او ارزښت خبرې وکړې او پر ټولو سوداګرو او هېوادوالو یې غږ وکړ چې د ښار په آبادولو او پاک ساتلو کې دې خپله ونډه او مسئوليت ترسره کړي.همدا رنګه، د صنعت او سوداګرۍ وزارت معین مولوي قدرت الله جمال، د یادې پروژې د جزئیاتو او اقتصادي ارزښت په اړه معلومات ورکړل او ویې ویل: د «شهر نو» پارک پروژې د پانګونې اندازه ۱۴ میلیونه ډالره ده؛ له دې پروژې څخه د اسلامي امارت عواید ۲۸ میلیونه ډالره دي او په پارک کې ۵۰۰ کسانو ته په مستقیم او غیرمستقیم ډول د کار زمینه برابرېږي.مولوي جمال زیاته کړه چې د پارک د بیارغونې پروژې د تړون موده ۳۰ کاله ده چې په درېو کلونو کې به یې چارې پای ته ورسېږي.د هغه د معلوماتو له مخې؛ په یاد پارک کې ۶۰۰ متره مربع ځمکه د معیاري جومات لپاره او د پارک د زرغونتیا لپاره ۶۵ سلنه ځمکه انتخاب شوې ده او دغه راز د ۳۰۰ موټرو لپاره د معیاري پارکینک ځای، تر ځمکه لاندې سوداګریز مرکز، د پارک په څنډه کې سوداګریز کمپلکس، د ښځینهوو لپاره ځانګړی سوداګریز مرکز، د فوټسال لوبغالی، تفریحي ځایونه، رسټورانټونه، د لامبو حوضونه او نورې آسانتاوې په پام کې نیول شوی دی.د یادونې وړه ده چې د «شهر نو» پارک عمومي چوکاټ په ۹۳ زره متره مربع ځمکه کې مشخص شوې ده چې د «مصطفی صادق عظیمي» شرکت له لوري په درېو کلونو به په معیاري او عصري ډول بیا ورغول شي.
