نورستان ولایت ۹۷هزارجه ۹۴۱جلد درسی کتاب نورستان ولایت سته کیوع کیوع ولسوالیں سته کیوع کیوع مکتب تں معارف وزارت پارستعں کتاب بټه کوسته بوتت.
نورستان ولایت سته معارف ریاسته جیښټ مولوی تاج محمد مطمین ګجیکو: یونیسف سته بدشره اداره سته دویی سناں مښ اینه سه تں نورستان ولایت تں درسی کتاب کښعں بوسته کی نه اترں اسیا باسته په روک بولا.
مطمین دی ګعں ایکی ولایت(نورستان) سته ۲۱۴مکتب تعں ګجیک ۵۰ مکتب می امشیں سته تعه اموں وای ای. امکیاں تعں ۳۰ مکتب تں اوجوپچوعه ایپاسته اویچ وای ای اینه دی پمښټه سته نه بولا.
شترک اینه وام تں یونسیف اداره سته دویی سناں سته دام توعه تں نوستان ولایت سته معارف ریاست تں مکتب بګانه ۶۱ خیمه سته دویی سناں دی بیسته ای سوره امکیاں مښ په تتی نورستان ولایت سته مکاتب تں کیوع کیوع ولسوالیں سته شاګردان مښ دویی سناں سته بوله چے امکی مکتب سته تعه اموں وا بوتت نیں نه وا بوتت با.
