نورستان ولایت تں لوکه جاز نشاں ډوره ایپاسته بوته

نورستان ولایت سته بنښک کعو (مرکز) پارون ښآرتں چی نی لوکه اچی جازنشتی اوتیلے بګانه جازنشاں ډوره ایپاسته کودیوم اوکښه یا.

باخترسته ښوپعله تں دیګعں! اچی واس کویں اینه بګانه نورستان ولایت سته کودیوم ساټ مولوی فیصل مختاروری وله تی ګیجکو: نورستان ولایت سته پارون ښآرتں چے کیوع کیوع بټه تں اوریاسته کودیوم تںسکال کتی کودیوم کوسته اویج اسه، اینه بګانه یاچاک اویج بوله بګانه یا به یسته تں ویک کودیوم کوسته بولا کی که وری وله تی اینه پتیان پوعوانه کعا.

ایکی اموسته وری تں ګجیکو: ایکی جاز نشاں ډوره کی اسه بلیوک پرمعں ستوک اسه اینه بګانه ګجیک دیونیم جریب بیم تں ایپاسته بوته چے اتکی کښعں که تره جازتں نشتی اوتیله کی که.

ایکی کودیوم بلیوک اچاک ټګاں مښ ایپاسته بوته نورستان ولایت تں ایکی دی بلیوک ګنوا کودیوم اسه.