مطالعه مهاره دیس مه ایک چنګی فرهنګ ته تبدیل هوجی

کتاب پړڼ کی فرهنګ این سماں مه مهاره دیس مه زیاد هوګئ انتی کوشش هوجاے چی یه فرهنګ دیں تی دیں غنی هوجاے.

انتی یه ایکه واقعیت تی ډاګ ګل اے چی کتاب پړڼ ایکی انسان که  بوجهاڼ تی معلومات اوس کی کا زیاد هوڼ کابستی موچ زیاد مهم انتے مطالعه اِس رقم ایک کم اے چی ذهن انسان کانه کهولي انتے منج انسان کی نه همیش ایک نویں معلومات کا جذب کرڼ کابستی اماده کرے. نویه ګل هم یاد کرڼ ته لازم اے چی حضرت ادم علیه السلام کاپیده هوڼ تی تاهوڼ تاکڼو کتاب پړڼ کی فرهنګ تا هوڼ کی نسل تاکڼو ایک نسل تی دوجه نسل ته ایک میراث کا شکل پو رے اے. نو اِس خاطر اګر کتاب کی رهنمائی نه هوتی نوکے جامعه بی کدے بی  آګی هم نیں تهو چلی انتے اپڼی ژیت نه بوجڼ کی لومه هم نی تهو لنګها سکیں.

 انتے ایک چنګی تے بوجڼی ژیت هم انسان نی تهو اپړسکیں، نواِس خاطر پوهرایکو هم تم کوشش کرلیاں چی اپڼی جن نه اپڼه ګهر کا لوکاں نه همیش کتاب پړڼ ته اماده کرلیاں اِس خاطر پو چی کتاب کو مطالعه تی کتاب ناړ علاقمندی سبب اِس ګل کی هوے چی انسان جامعه مه بوجڼ کی لومه اپڼی ژیت نه پیل کرلیاے. نوایس خاطرپو هبه جوان نسل اِس هوره اګلی نسل تی کتاب پړڼ کی عادت نه لچهلیاے تا چی کاډ کی هبه نسل ایک با فرهنګ تی کتاب پړنی تی مطالعه کرنی نسل بړے هوجاے. کتاب تے قلم دین مقدس اسلام مه تی مهاره دیس که افغانی فرهنګ مه موچ ایک بړو مقام تے حصو درهاے. انتے یي دونیں ناں چی کتاب کوتی قلم کوناں اے یي مهاره افغانستان کا لوکاں ته ایکو نا شناس ناں نیں بلکه اګلا وختاں تی تا هوڼ تاکڼو مهارو لوک این دونه ناں ناړآشنا اے، انتے کوشش کرے چی اپڼی ژیت نه کتاب کا پړڼ  پوتی قلم کا لیکهڼ پو لنګهالیاے.