قوشتېپه کانال او د هيواد د ښې راتلونکې څرکونه!
د هيواد د يوې سترې او اساسي پروژې قوشتېپې کانال د لومړۍ برخې کارونه وړمه ورځ په ډېرې چټکۍ او بريالي ډول سره پای ته ورسېدل.
د هيواد د يوې سترې او اساسي پروژې قوشتېپې کانال د لومړۍ برخې کارونه وړمه ورځ په ډېرې چټکۍ او بريالي ډول سره پای ته ورسېدل. د دغې پروژې کارونه په درېو برخو وېشل شوي، لومړۍ برخه يې د يوسل او اته (۱۰۸) کلومتره کانال د کيندنې چارې وې، چې په ډېر چټک ډول پای ته ورسېدې. بل مهم اړخ يې دا و، چې ټولې تخنيکي او فني چارې يې د افغاني انجنيرانو او شرکتونو له لوري مخته يوړل شوې. بله مهه نقطه داده چې د دغې سترې او ملي پروژې تمويل له هر ډول بهرنۍ مرستې پرته له خپلې بوديجې وشو.د دغې پروژې د لومړۍ برخې د کارونو بشپړېدو وښوده، چې اوسنی اسلامي حکومت په څومره اندازه ملي ګټو ته ژمن دی او په څومره پراخه کچه د هيواد جوړونې لپاره هڅې کوي او دغه راز يې په ټولو چارو او برخو کې د دې نظام پوره خپلواکي او استقلال ثابت کړ، چې د خپلو ملي ګټو په خاطر د هېچا غوښتنې او فرمايش ته غوږ نه نيسي.ټول افغان ملت د دغې سترې پروژې د لومړۍ برخې د چارو په بشپړېدو خوشحاله دی او د سوکالۍ احساس لري او دغه راز ښې او روښانه راتلونکې ته يې هيلې ډېرې شوې دي. په ټولنيزو رسنيو کې ددغې پروژې په هکله د ټول افغان ملت احساس او ملاتړ د ستاينې وړ دی، هغوی ټولو په يوه خوله دا کار د هيواد رغونې او ځان بسياينې په برخه کې بې ساری ګڼلی او د اسلامي امارت جديت او ژمنتيا يې ستايلې ده.رښتيا هم د قوشتېپې کانال پروژه ډېره مهمه او حياتي ده، چې په جوړولو سره يې افغانستان د زراعت او خوراکي توکو د توليد په برخو کې پر ځان بسيا کېږي او د اقتصادي چارو کار پوهان په دې اند دي، چې ددغې پروژې په تکميل سره زراعت صنعتي کېږي او د افغان ملت لپاره خورا ډېرې اقتصادي ګټې لري.که څه هم اسلامي امارت ددغې پروژې د پاتې برخو پر ژر جوړولو ټينګار کړی او د لومړۍ برخې د کار چټکتيا ته په پام سره هم داسې ښکاري، چې د پاتې برخو چارې به هم ډېر ژر پيل شي، خو بيا هم د ټول ملت غوښتنه دا ده، چې د دغې پروژې د پاتې برخو پوره کولو ته دې هم جدي پاملرنه وشي. افغان ملت ډېر کلونه په جګړو، ژورو خپګانونو او غمونو کې تېر کړی او د داسې پروژو په جوړېدو سره د خوښۍ احساس کوي او د لا ډېر کار هيله لري.افغانستان تېر څلوېښت کلونه د سختو جګړو له امله د پرمختګ او تمدن له کاروانه وروسته پاتې دی، اوس چې الحمدلله يو مثالي امنيت تامين دی او ځواکمن او يوموټی اسلامي نظام لرو، بايد د رغونې او پرمختګ چارې لا ډېرې شي او افغانستان له نړۍ او سيمې سره سيال شي.
