قوشتېپه، بهاند زر…!
افغانستان چې په وچه کې راګير هيواد دی ، د شاوخوا څلوېښتو کلونو جګړو له امله يې پر نورو برخو سربېره اقتصادي وضعيت هم د پام وړ کمزوری دی او تر ډېره يې پر وارداتو تکيه ده.
افغانستان چې په وچه کې راګير هيواد دی ، د شاوخوا څلوېښتو کلونو جګړو له امله يې پر نورو برخو سربېره اقتصادي وضعيت هم د پام وړ کمزوری دی او تر ډېره يې پر وارداتو تکيه ده.
واک ته د اسلامي امارت له رسېدو وروسته د هيواد د زيربنايي پروژو د رغونې چارې پيل شوي او هڅه کېږي، چې هيواد پر ځان بسيا شي، زموږ د هيواد د بسياينې په برخه کې زراعت ډېر مهم رول لري او د زراعت لپاره اوبه د بهاندو زرو حيثيت لري.
د دغو هڅو په دوام څو ورځې وړاندې د هيواد د يوې سترې او اساسي پروژې قوشتېپې کانال د لومړۍ برخې کارونه په ډېرې چټکۍ او بريالي ډول سره پای ته ورسېدل. دغه سترکانال ۲۸۵ کیلومتره اوږد دی، د بلخ ولایت د کلدار ولسوالۍ د آمو له سیند څخه پیلیږي او د فاریاب ولایت اندخوی ولسوالۍ کې ختمېږي، بر يې شاوخوا (۱۰۰)متره او ژوروالی یې ۸/۵ متره دی. دغه کانال په يوه ثانیه کې د ۶۵۰ مترو مکعبو اوبو د انتقالولو ظرفیت لري شاوخوا ۵۰۰ زره هکټاره ځمکه خړوبولی شي.
د قوشتیپې کانال کارونه درې پړاوونه لري: اول پړاو ۱۰۸ کیلومتره اوږدوالی لري، د آمو له سیند څخه پېل او د بلخ دولت آباد ولسوالۍ ته رسېږي، چې ددغې برخې کارونه يې د الله تعالی په مرسته او د اسلامي امارت د ډېر تمرکز له امله په ډېر ښه ډول پای ته ورسېدل.
د تېرې چهارشنبه په ورځ د اسلامي امارت د يو لوړپوړي پلاوي له لوري رسماً پرانيستل شو او د دوهم پړاو، کارونه يې پيل شول. د دوهم فاز اوږدوالی ۱۷۷ کیلو متره دی، چې د بلخ له دولت آباد څخه پېل او د جوزجان ولایت له آقچې ولسوالۍ څخه تېریږي او د فاریاب ولایت اندخوی ولسوالۍ ته رسېږي. درېم پړاو پر زراعتي ځمکو د فرعي کانالونو د تقسیم دی، چې د لومړي پړاو د بشپړتیا لپاره یو کال او د پاتې دوو پړاوونو لپاره پنځه کاله وخت په نظر کې نیول شوی دی.
د دغې پروژې مهم اړخ دا دی، چې ټولې تخنيکي او فني چارې يې د افغاني انجنيرانو او شرکتونه له لوري مخته وړل کيږي. بله مهه نقطه داده چې د دغې سترې او ملي پروژې تمويل له هر ډول بهرنۍ مرستې پرته له خپلې بوديجې کېږي. د دغې پروژې د لومړۍ برخې د کارونو بشپړېدو وښوده، چې اوسنی اسلامي حکومت په څومره اندازه ملي ګټو ته ژمن دی او په څومره پراخه کچه د هيواد جوړونې لپاره هڅې کوي او دغه راز يې په ټولو چارو او برخو کې د دې نظام پوره خپلواکي او استقلال ثابت کړ، چې د خپلو ملي ګټو په خاطر د هېچا غوښتنې او فرمايش ته غوږ نه نيسي.
ټول افغان ملت د دغې سترې پروژې د لومړۍ برخې د چارو په بشپړېدو خوشحاله او د سوکالۍ احساس لري او دغه راز ښې او روښانه راتلونکې ته يې هيلې ډېرې شوې دي. په ټولنيزو رسنيو کې ددغې پروژې په هکله د ټول افغان ملت احساس او ملاتړ د ستاينې وړ دی، هغوی ټولو په يوه خوله دا کار د هيواد رغونې او ځان بسياينې په برخه کې بې ساری ګڼلی او د اسلامي امارت جديت او ژمنتيا يې ستايلې ده.
رښتيا هم د قوشتيپې کانال پروژه ډېره مهمه او حياتي ده، چې په جوړولو سره يې افغانستان د زراعت او خوراکي توکو د توليد په برخو کې پر ځان بسيا کېږي او د اقتصادي چارو کار پوهان په دې اند دي، چې د دغې پروژې په تکميل سره زراعت صنعتي کېږي او د افغان ملت لپاره خورا ډېرې اقتصادي ګټې لري او داسې هيلې پيدا شوي دي، چې ګران هيواد افغانستان به په ډېره لنډه موده کې د نړۍ او سيمې له هيوادونو سره سيال شي او زموږ ځوريدلی ولس به نور له تلپاتې سوکالۍ او ښېرازۍ څخه برخمن شي.
