غزني کې د خلکو په شخصي لګښت يوه ښوونځي ته ودانۍ جوړه شوه

د غزني د مالستان ولسوالۍ داوسېدونکو له لوري په دغې ولسوالۍ کې يوه ښوونځي ته جوړه شوې ودانۍ پرانېستل شوه. دغه ښوونځي د مالستان ولسوالي په کمرک کلي کې جوړ شوي چې ټول لګښت يې د سيمې د اوسېدونکو له لوري ورکړ شوي دي. پر ياد ښوونځي درې نيم ميليونه افغانۍ لګښت راغلي چې ۱۲۰۰ نجونو او هلکانو ته په‌کې د زده‌کړو زمينه برابره شوې. د غزني د پوهنې رئيس سيدمير نصيراحمد حسيني د ياد ښوونځي د پرانېستلو پر مهال د سيمې له خلکو د ياد ښوونځي د جوړېدو له امله مننه وکړه. له دې وړاندې هم د ياد ولايت په مالستان، جاغوريو، اندړ او جغتو ولسواليو کې خلکو په خپل شخصي لګښت ښوونځي، روغتيايي مرکزونه او لويې لارې رغولې دي.