عبدالسلامی حنفی: اسلامی امارت سته ښے واستوک منچاں سته نه اترں په روک کوسته بګانه ابل کوتت
افغانستان اسلامی امارت ریاسة الوزراء سته اداری کودیوم ساټ مولوی عبدالسلام حنفی دلو ماس سته پوچ بولی واس تں سرپل ولایت سته بلخاب ولسوالے سته آړه ښے واستوک جےکشیردعیں مښ وری وله تی اینه پتیان پوعوانه کعا کی اسلامی امارت سته ښے واستوک منچاں سته اویج بولاں پوړاسته بګانه ابل کوتت کی که.
باخترسته ښو پعله تں ګجیکو: ایکی وعیک وعیک تں عبدالسلام حنفی سرپل ولایت سته بلخاب ولسوالے سته کشیردعی جے علماء مښ وعیک وعیک ګتی وری وله تی امکیاں سته کی نه اترں بګانه کی اویج بوله کودیوم اسیه باسته بګانه امکیاں سته وری کارته تتی اچاک دی لسته که امکیاں مښ وری وله تی اینه پتیان پوعوانه اسلامی امارت سته ښے واستوک ایموسته ګول وعیں سته اویج بولا پوړاسته سوره امکیاں کں کودیوم کوسته کں لسته که سناں وښټه تی اوتی نسته ای اینه بګانه ایموسته ګول وعیں تں اینه پتیان پمیوک تتمیش کی! ایموسته ګول وعیں سته کی انه اترںامنیتی بټه تں بوتته نیں لتری سته بټه بوتت با سوره امکیاں مښ په تتی ورں دی کی اویج بوله ای با امکیاں لسته که ایموسته ګول وعیں کودیوم کوسته کں برں بیسمیش کی که. ایکی وعیک وعیک تں امکی کشیردعیں دی اسلامی امارت سته ایکی ایکی زربعزاں وعں تی امشیں سته اوکام وارپوعوانه کتی اسلامی امارت سته مښ امشیں سته وریک بوں پوعوانه کعا.
