شمشیر تی قلم کو تفاوت دولت داری مه

مقدمه ابن خلدون:

شمشیر تی قلم کو تفاوت دولت که جوړڼ مه باید جی بو جریاں جی شمشیر تی قلم ایکو وسیلو دولت که لوک که بستی اے، جی اپڼه فرمان نه مه اون تی کم لیاے، کیړه وخت مه جی دولت جوړی نی تی اوس که پیرباټه نی هویه اوس وخت مه پادشاه کی ضرورت شمشیر ته موچ اے. کیم جی قلم وه خدمتګزار جی احکاماں که تنفیذ مه کم دیاے، شمشیر ایس راه که تنفیذ مه هم موچ کمک کرے، کیړه وخت مه جی دولت کو زور تی زر ضعیف هوګیو اوس صورت مه دولت که بړاں کرسکیں جی شمشیر تی احکاماں که تنفیذ که بستی کم لچیاے. ایس ګل تی معلوم هویں جی قلم تی شمشیر ایکی دوجاں که لازم تی ملزوم اے، یعنی این دواں تیں باج دولت کو جوړڼ موچ مشکل اے.

 اګرهم اګلاں صحاباں که وخت ته تی قرن اول جی رسول الله کو دعوت کو وخت اے، انتی احکام که تنفیذاں کو هم وخت تهو هم این دواں شیاں تیں اسلام که اګی جاڼ مه استفاده هویو اے. ایس خاطرتی قلم اسلام که دین مه موچ بړو نقش درهاے، ایکو نقش اوس کو یو اے جی تمام اشیاں دنیا که جی الله نی انساناں که بستی چلیاے تیں انسان اون پو بوجیاے تی اپڼی زندګی نه اګه ته لیګیاے هبیں ایس قلم کی برکت اے. دنیا کی یه ترقی تی اګی جاړڼ، دنیا کو یو کتنو علم جی اج بشریت که خدمت مه قرار درهاے هبیں ایس قلم کی برکت اے، ایس خاطرتی الله نی قلم اپڼی کتاب مه ذکر کیو اے تی اوس نه موچ اوجو مقام دیتو اے، قلم ایسو ایکو ابزار جی اګر چنګه راه پو استفاده هوجیاے انسان نه هم موچ اوچو مقام ته اپړاے.

            اګر منده راه پو کوړتی کم لیجاریاے اوس صورت مه انسان که ذلت پو تمام هویں. شمشیر هم قلم که شانتهو موچ اوچی ټهار درها ے، اګر شمشیر که اصلی فلسفه ته توجه کرلیاں اسلام که دین که اګی جاڼ مه هم موچ نقش درهاے، یو دین جی اج هم ته آیو هم ایس شمشیر کی برکت تی اون شیداں کی برکت تی جی اون نیں اپڼی سوڼی پاک رت ایس شمشیر که طریق تی ډهولی اے، تی یو دین هم ته اپړے یو اے، جی شکر الحمدالله ایس کی برکت هزاراں پو تیں لکهاں پو مسلماڼ ایس جهان مه وجود درهاے، یی هبیں ایس شمشیرکی تی قلم کی برکت اے.

 اصلی هدف میرو ایس رومه اے جی دولتاں کو جوړڼ تی ورانڼ این دواں شیاں شروع هویں، اګر الله احکام چنګه وزن پو قلم پو لیکهیں ګیاں تی چنګه وزن پو تنفیذ هویاں اوس صورت مه دولت کو نظام دیں تی دیں چنګو هوتهو چلی تی امنیت دیس مه باټی هویں، اګر قلم تی مندو استفاده کیو تی، لوک کو حق تلف هویو ایس صورت مه نظام کی بربادی پو اے یو قلم. اګی میں کیو جی قلم تی شمشیر ایکی دوجاں که دولت که جوړن مه لازم تی ملزوم اے، شمشیر هم اګر منده وزن پو استفاده هویو دولت تی نظام کی تباهی پو اے. کتنی جی ابر قدرت اے جهان مه این دواں شیاں نیں جوړی تی ورانی اے.

 مهاره رهبر ایس دیس مه این دواں وسیلاں تی چنګه وزن پو استفاده کرلیاے، تی اپڼه دیس نه چنګه وزن پو جوړلیاے، کیوزن جی هوراں لوک نیں اپڼو دیس جهوړیو اے، دیس که جهوړڼ مه ایک موټی نه هویں تی، بارکه دشمناں نه، نه سیاڼڼ نو ایس دیس کو جوړڼ نا ممکن اے، هر وخت مه جی دیس که بړاں ایک هت هویاں تی اپڼه دیس که دشمن سیاڼیاں اوس وخت مه کرسکیں جی اپڼه دیس نه جوړلیاے.