د اسلامي امارت د ارشاد، حج او اوقافو وزارت سرپرست او د حج بعثې عمومي رئيس شېخ الحديث دکتور مولوي نورمحمد ثاقب په مکه مکرمه او جده کې د افغانستان د وقفي ځمکو، چې د بېلابېلو افغان واکمنانو په واکمنۍ کې اخيستل شوې دي، د بېرته راګرځولو په اړه په رياض کې د افغانستان د سفارت له مسئولينو سره کتلي دي.د ارشاد، حج او اوقافو وزارت څخه په خپره شوې خبرپاڼه کې راغلي، چې د دغو ځمکو تر بېرته راګرځولو وروسته به افغان حاجيانو ته پرې دايمي استوګنځايونه جوړ کړي.دغه راز د ارشاد، حج او اوقافو وزارت سرپرست، د اسلامي همکاريو په سازمان کې د افغانستان سفير او دايمي استازي ډاکټر شفيق صميم او په جده کې افغان قونسل ډاکټر شېرمحمد له هغې شا او خوا څلور جريبه ځمکې څخه هم ليدنه وکړه چې د فيصل بن عبدالعزيز د واک پر مهال افغان حکومت ته سپارل شوې وه.سعودي عربستان کې د افغانستان سفارت مسئولينو ډاډ ورکړی، چې د دغو ځمکو د بېرته راګرځولو لپاره به له سعودي چارواکو سره موضوع شريکه کړي.د معلوماتو له مخې، افغانستان مکې مکرمې ته نږدې په ۹۰۰ مترۍ کې د سليمانيه سيمه کې يوه اندازه ځمکه لري، چې په ۱۱۳۶ هجري کال کې د لومړني پاچا احمدشاه بابا له لوري پېرل شوې او د احمدشاهي رباط په نامه يادې ده، خو د حرم شريف په نوي پراختيايي پروګرام کې دغه ځمکه هم د سعودي حکومت له لوري د حرم شريف په احاطه کې شامله شوې.همدارنګه د افغانستان بل پاچا نادرخان هم په ۱۳۵۰ هجري کال کې د کعبې شريفې په ۴۰۰ مترۍ الشبيکه سيمه کې يوه ټوټه ځمکه پېرلې وه، چې د نادرشاهي رباط په نامه نومول شوې وه.د يادونې وړ ده، چې دغه ځمکې د استملاک او حقوقي مسايلو له حل وړاندې د حرم شريف په نوي پراختيايي پروګرام کې شاملې شوي او افغانستان ته يې بديل په نظر کې نه دي نيول شوي.
