رئيس الوزراء: له مهاجرینو سره پر ناوړه عمل به پاکستان له موږ څخه د څه تمه ولري

د اسلامي امارت رئيس الوزراء ملا محمد حسن اخوند  پرون په يو ويډيويي پيغام کې ويلي، چې د پاکستان حکومت د افغان کډوالو د ځورولو حق نه لري. نوموړي ويلي، که د پاکستان حکومت له  اسلامي امارت سره ستونزه لري؛ نو بايد د خبرو له لارې يې حل کړي. رئيس اولوزراء ويلي: د کډ‌والو ازارول، د هغوی شتمنۍ نيول، کورنه يې ورانول او په راتګ کې ورته ستونزې جوړول په يو قانون کې هم نشته او د پاکستان حکومت بايد افغان کډوالو ته وخت ورکړي ، چې په عزتمندانه ډول خپل هيواد ته راستانه شي. رئيس الوزراء دغه راز ويلي، ټولو ادارو ته يې امر کړی، چې د افغان کډوالو ستونزو ته د رسېدو لپاره له ټولو امکاناتو کار واخلي. هغه له خلکو هم غوښتي، چې افغان کډوالو سره مرسته وکړي.