په بادغیس کې د ۲۵ کیلومترو په اوږدوالي د قیصار- لامان حلقوي سړک د څلورمې برخې د پخولو چارې پیل شوې. د یاد سړک چارو د پیل مراسمو کې د بادغيس والي عبدالصمد جاوید وويل، چې دغه سړک د غورماچ ولسوالۍ له دوابي سيمې څخه د بالامرغاب ولسوالۍ تر مرکز پورې غځېدلی، چې ۲۵ کیلومتره اوږدوالی لري. جاوید زیاته کړه، چې د قيصار – لامان حلقوي سړک پخول یې له کاري لومړيتوبونو څخه وو، چې له نېکه مرغه د څلورمې برخې د پخولو چارې نن پیل شوې او لګښت یې د اسلامي امارت له لوري ورکول کېږي.
