سرلیکنې

د قمري تاریخ ټاکنه پوره دقت غواړي

که څه هم زموږ دفتري چارو کې تر ډېره لمریز کال او میاشتې معمول دي ځکه یو خو د دې تاریخ مبد‌أ هم نبوی هجرت دی چې ان د صحابه وو په زمانه کې ټاکل شوې او بل دا چې ښه دقیق او منظم دی او له همدې وجې کمپیوتري سیستم سره هم مناسب دی.

که څه هم زموږ دفتري چارو کې تر ډېره لمریز کال او میاشتې معمول دي ځکه یو خو د دې تاریخ مبد‌أ هم نبوی هجرت دی چې ان د صحابه وو په زمانه کې ټاکل شوې او بل دا چې ښه دقیق او منظم دی او له همدې وجې کمپیوتري سیستم سره هم مناسب دی. البته د قمري میاشتو دقیقه کتنه، څارنه او ټاکنه بیا له دې امله مسلمانانو ته ډېره مهمه ده چې د حج، روژې، اختر او داسې نورو برکتي شپو ورځو ټاکنه بیا د سپوږمۍ پر حساب چلیږي. بنا پر دې د اسلامي امارت هغه ادارې او مسوولین چې د همداسې مذهبي چارو پر تنظیم ګومارل شوي، دایې ذمه واري ده چې د میاشتې (هلال) په څارنه او کتنه کې پوره هڅه او دقت وکړي؛ ځکه ښکاره ده چې په دغسې مواردو کې وړه اشتباه هم د هېواد څلوېښت میلیونه وګړي له ستونزې، ګډوډۍ او پرېشانۍ سره مخ کوي. د مثال په ډول سږ کال د شعبان او رمضان دواړو میاشتو د پیل کېدو په اعلان کې د هلال کمېټې او ستورپوهانو خبره یوه نه وه- چې بالاخره هلال کمېټۍ له څو غبرګو اشتباهاتو سره سره مخ شوه- یو دا چې ښايي د شعبان هلال یې سم نه وڅارلی، بل دا چې هماغسې د خپل حساب له مخې یې د شعبان نهه ویشتمه (۲۹) اته ویشتمه وګڼله او سترې محکمې هم پر همدې اساس ښکاره اعلان وکړ چې سبا «دوشنبه» روژه نشته- همدارنګه بله اشتباه دا هم شوه چې په اعلان کې تلوار وشو خو څو ساعته وروسته بیا د همدې شعبان د غلط نهه وېشتم تاریخ ورځ د رمضان لومړۍ ورځ اعلان شوه په دې هکله زموږ د ورځپاڼو په شمول ګڼو رسنیو ته له هرې خوا ډېرې ګیلې او نیوکې راورسېدلې، چا ویل له لومړي اعلان سره سم یې روژه نه ده نیولې، چا ویل تراویح مو و نه کړې، چا ویل هلال کمېټه وسایل نه لري او چا ویل بیا هم سپوږمۍ نه ده لیدل شوې، بلکې د سعودي عرب او ځینو نورو هېوادو اعلان یې معتبر ګڼلی او داسې نور- په هر صورت مهمه داده چې واقعاً د قمري میاشتو په کتنه کې تر خپله وسه کوښښ په کار دی- تردې چې که سم وسایل موجود نه وي نو داسې هم کېدی شي چې مثلاً هرات، فراه او نیمروز ولایتونو کې ماښام مهال کومه الوتکه د وریځو په شتون کې نسبتاً لوړه الوتنه وکړي او د هلال په اړه څو کسه شاهدان د خپلو سترګو لیدلی حال تر لاسه کړي- مطلب دا چې دغه موضوع ځکه اړینه ده چې د ټول هېواد وګړو سره نېغ په نېغه تړاو لري او د کمې اشتباه په صورت کې هم ټول له پریشانۍ سره مخ کیږي او هم اړوند چارواکي پړه او ملامت ګڼل کیږي- هیله ده په دې موضوع کې دغه شان بې احتیاطي بیا تکرار نه شي.

Related Articles

ځواب دلته پرېږدئ

ستاسو برېښناليک به نه خپريږي. غوښتى ځایونه په نښه شوي *

Back to top button