کاډ بیاں سمه جهاد کاں تی هوڼ هم ایک سوچو اسلامی نظام ایس دیس مه درهاواں اے، نو یو نظام موچاں قرباڼیاں پو هت ته آیواے انتی ایس اسلامی نظام کو رکهڼ ایک ملی وجیبه هبه بیسڼه ایس دیس کاں کواے جی اپڼه اسلامی نظام تی حمایت کرلیاے انتی اوس کی حفاظت کابستی جن نه مکلف دکهلیاے. یو نظام ارمان اون شیداں کواے جی اوناں نی اپڼی سوڼی ژیت ایس راه مه هت تی دیتی اے، انتی هم اج اون کا مدیون احسان کا اے.
کاډ ایستی جی اشغال ګر امریکا نی اپڼه هبه دار دسته سمیت افغانستان پو حملو کیو انتی یو دیس اپڼه هت کی هیټ آڼ لیو نو افغانستان کا غیرت مند تی مجاهد لوک نی یه ګل یو اشکار تجاوز امریکا کو تحمل نکرسکیو انتی هر ډهاتی جهاد امریکا کا تی ناتو کا مقابل مه اعلان کے جی ایس ګهوړ مه موچ جوان مهاره دیس کا چی وی اکثر حافظ قرآن عظیم الشان کاتی مولوی تی طالب مدرساں کا تها ایس گهوړ مه شید هویا، انتی سوڼی جن اپڼی اوناں نی هت دیتی ولی یه جهاد افغانستان کا متدین لوک نی دوام تا اوس وخت تاکڼو جی امریکا نی شکست کهدو انتی ایس دیس موکاړو پهچیں چورلیو.
امریکا موچ بړه کبر تی غرور پو افغانستان ته آیو تهو ولی ایستی نیں تهو خبر جی افغانستان اپڼه ډهیډ مه ایسه جوان تی مبارز درهاے جی کتنی امپراطوریاں نه شکست دیتواے، انتی اخر مه بهی یو امریکا تهو جی اینویں موکاړو ایس دیس پهچیں نکهړګیو. کیوزن چی آپی اکثر بار کا دیساں کا ایس ګل نه ډاګ کیاے جی افغانستان قبرستان امپراطوریاں کواے انتی ایس دیس نه کویں بهی زور پو نیں نپ سکتو ایس خاطر پوجی یو دیس ایسو باغیرت تی باشهامت لوک درهاے جی بیګانه کا زور نه تی تجاوز نه کدے بهی اپڼی جن پو نیں منته، انتی اخر لحظه اپڼی عمر کی تاکڼو مبارزه اپڼه تجاوز کرناں کا مقابل مه دوام دیاے.
