ییلینگ اون ایکی آیی و تورت فصلی – دا اؤز یرنده و دورلی لیگی بیلن الهی نعمت دیر. بو اویتگشیک انسانینگ یاشایشی و ایگوسیستم اوچین اؤرأن ارزشلی دیر. هر فصلینگ اؤزی بویونچا بوتین یاشایش دا آیراتین اورونی باردیر. یؤنه بهار فصلی بولسا غیش فصلی نینگ سووقلی هواسیندان ایرن جاندالارا تازه یاشایشی و دیریچیلیگی سوغات اتمگی بیلن غارشی لانیور.
شونلیق دا بهار فصلی نینگ یتیپ گلمگی اساسیندا بوتین جاندارلار تازه دیریچیلیگه باشلایور. بو فصل دا عین گؤکلیکلر، یرینگ یوزینه اورتیپ تازه لیک گتیریشی یالی، بوتین دنیا دا یاشایون آدملار هم بو فصل دا اؤز اؤیینی و وطنینی غوروپ گؤزللشدیرمک اوچین ایشه باشلایورلار.
بیز افغانستان خلقی دا بو جهانینگ بیر بؤلگی دیریس. بیز لرده بو فصل دا اؤیی میزی، یاشایون جای میزی و وطنی میزی گؤگوش اتمک اوچین الیمیزده بار بولان گویجی میزی صرف اتمگی میز گرک. بو ایشی عملله آشیرماق اوچین بولسا بیرینجی دن اؤز اویی میزه یا- دا یاشایون یری میزه بیر دویپ نهال اکمک بیلن باشلاماغی میز گرک.
بیر نهال اکمک بیلن بیر آغاجا تازه یاشایش گلمگینه سبب بولماقدان باشغا دا اوبا و شهرلری میزی گؤگیش ادیپ، ییگیرمه گیشی اوچین آکسیجن اؤندوریپ طبیعته غوشاندیمیزی غوشوپ بیلیوریس.
آیتماقلارینه گؤرأ، بیر وقتلار عزیز اولکأمیز افغانستان دنیا اولکه لری نینگ ایچینده اینگ گؤزل اولکه لر جمله سیندن بیری بولوپ، کابل شهری اینگ گؤزل سیاحتچیلیقلی شهرلرینگ بیری بولوپ دیر. یؤنه سونگقی وقتلاردا اولکامیزده یوز برن سواشلار و باسماچیلیقلار سببلی اولکأمیزینگ اولی شهرلری اوسوش ایشی یوز برمزدن داشاری؛ کؤپ ویرانچیلیقلار یوز برندیر. شونلیق دا اولکأمیزینگ باری یوغی یوق بولوپ دارغاپ گیدن دیر.
بو گون خداوند کریم ینگ لطف و عنایتی و اولکه داشلاری میزینگ اولی همتی بیلن، یوردی میز بوتین لین غاراش سیزلیغا یتیپ آزادلیق نعمتینی ینه بیر گزک دادن دیر. بو یاغدای دا افغانستان خلقی اولکأمیزی غایتادان اوسدوریپ باغ بوستان لیغه اؤرمک اوچین بیل باغلامالی دیرلار. بو ایشی ده اولی بولمادیق زات بیلن ممکن بولدیغیندان بیر دویپ نهال اکمانه باشلامالی دیریس.
