که څه هم څلوېښت کلنې جګړې افغانستان له ګڼ شمېر ننګونو او چلنجونو سره مواجه کړی؛ خو دغه هيواد د اسيا په زړه کې موقعيت لري، د منځنۍ اسيا او جنوبي اسيا ترمنځ د ترانزيټ او وصل له ټولو ښه لاره ده، د طبيعي منابعو له درکه خورا شتمن دی او ددې ترڅنګ د پانګونې لپاره ښه فرصتونه لري او طبيعي ده، چې ددغې جغرافيې ثبات او پرمختګ د سيمې د پرمختګ لپاره مهم دی. پر افغانستان د اسلامي امارت له واکمنۍ وروسته دلته سرتاسري ثبات رامنځته شوي، د سيمې او نړۍ هيوادونه دې د افغانستان د ثبات له دوام سره مرسته وکړي، موجود حکومت دې په رسميت وپيژني، په نړيوال سټيج دې د افغانستان رښتينی او واقعي انځور وړاندې کړي او که داسې نشي کولی، د افغانستان د بې ثباتۍ هڅې خو بايد بيخي ونه کړي، خپلې ستونزې دې په خپله حل کړي او که چېرته د افغانستان په هکله اندېښنې لري، په رسنيو او نړيوالو غونډو کې د يادولو پرځاي يې بايد د ډيپلوماتيکو چينلونو له لارې مخامخ افغان له حکومت سره شريکې کړي. د افغانستان اسلامي امارت په تکراري ډول ژمنه کړې، چې خاوره به يې د نورو پرضد ونه کارول شي او د سيمې او نړۍ هېوادونو ته يې په عمل کې ثابته کړې هم ده، چې د منظمو او مجربو امنيتي ځواکونو پر مټ يې هيچاته اجازه نه ده ورکړې، چې د افغانستان خاوره د چا پر ضد وکاروي. له افغانستان څخه د نړۍ هيڅ هيواد ته ګواښ نه دی متوجه، د افغانستان امنيت اوس د نړۍ له ډېرو هېوادو ښه دی، هيڅ هيواد او ټولنه بايد د افغانستان خاوره او حاکم نظام د ځان لپاره ګواښ ونه ګڼي، افغانستان څلور لسيزې د جګړې قرباني هيواد دی، د جګړې ناخوالې او زيانونه له بل چا ښه درک کولی شي او هېڅکله به د مسلمانۍ او ښه ګاونډيتوب په خاطر نورو ته زيان و نه رسوي.افغانستان د نړيوالې ټولنې د يو مسئول هيواد په حيث دنده او مسؤليت لري، چې اجازه ورنه کړي، خاوره يې د نورو پر ضد وکارول شي؛ خو نور هيوادونه هم ورته مسئوليت او مکلفيت لري او هيڅ هيواد دا حق نه لري چې د افغانستان د بې ثباتۍ هڅې وکړي. څلوېښت کلنې جګړې ثابته کړه، چې د افغانستان ناامني او بې ثباتي د هيچا په ګټه نه ده، بلکې د ناامنۍ زيانونه يې ټولې نړۍ او سيمې ته خطر او ګواښ دي. اوس چې افغانستان ته امنيت او ثبات راغلي، نړيواله ټولنه او سيمه یيز هيوادونه دې دغه حالت د ځان لپاره ګواښ نه، بلکې فرصت وګڼي، دلته دې پانګونه وکړي، د افغانستان له لارې دې نړيوالې سوداګرۍ ته وده ورکړي، د ټاپي او کاسا۱۰۰۰ په څېر د مهمو او بنسټيزو اقتصادي پروژو د سرته رسېدو لپاره دې عملي هڅې وکړي.لنډه دا چې د افغانستان خاوره او اوسنی حالت د هيڅ هيواد لپاره ګواښ نه دی او نه يې بايد څوک ګواښ وګڼي، بلکې طلايي فرصت دی، نوی افغان حکومت هم هرچاته د دوستۍ غيږ پرانيستې ده؛ خو دا اوس په نړيوالې ټولنې او سيمه ييزو هيوادونو پورې اړه لري، چې څومره او څه ډول له دغه حالت څخه ګټه اخلي.
