افغانستان جهان مه ایکی زراعتی دیس تی ګیڼی جاے انتی ایسو مناسب هوا تی پاڼی ایس دیس مه هے چی زراعت چنګه شکل پو ایس دیس مه رشد کرے. انتی یه ګل هم تم هبه پړناں محترماں ته یه ګل ډاګ اے تی مالوم اے چی مهاره دیس افغانستان که لوک کو اقتصاد اکثر اطراف کی ولایت ایس دیس کیاں مه ماړ پوتی زراعت پو استواراے، انتی خصوصاًهاړ مارڼ موچاں اګله وختاں تی اینګه ریواے ایس خاطر پوچی اګله وختاں مه مهاره دیس مه هوڼ که یی ماشین نیں تها انتی اکثر هاړ مارنه لوک مهاره دیس که اوس وخت مه اپڼی زیمیاں نه ډنګراں کی هاړ ماری تها انتی اپڼی ژیت که اقتصادی حالت نه آګی لک چلی تها انتی هوڼ بهی یو کم اکثر اطراف کی ولایت مهاره ایس دیس کیاں مه دوام درهاے.
انتی یه ګل هم ایت یاد کرڼ ته اے چی افغانستان موچ اګله وختاں تی اینګه ایکی زراعتی تی ماړ رکهڼه دیس کاناں پو یاد هویو اے. اسپو چی اِس دیس مه چنګو مناسب هواتی، چنګو پاڼیں زراعت تی ماړ کاپیڼ کابستی مساعد اے اما ایکه بړے مشکل چی همیش مهاره دیس کو هبو لوک اوس مشکل تی رنج لچلے وه نا امنی تی ګهوړ اِس دیس مه اے اِس معنی پوچی اګر مهاره اِس دیس مه ارامی هوے نو هبو لوک مهارو باج کی مشکل تے اپڼه دیں کا روزګار کا آګی لیګجاڼ کابستی هر ډهاتی کوشش کرے، کی هاړ مارڼ کا طریق تی هوے کی هوراں کی چنګه تی حلال راه تی هوے اپڼه ډیره جوګی ایک حلال نواړو ټوک کو پیده کرے.
انتے ایکه بړے مشکل چی این سماں مه مهاره دیس که هاړ مار نه لوک اوناں ناړ مامو اے وه یاے چی هوڼ بی مهاره دیس که هاړ مارناں ته زمینه چنګه اصلاح هویه بیج کوتے، کود کیمیاوی کو برابڼ نی هویو چی هاړمارنه لوک مهاره اوناں تی اپڼی زیمیاں مه استفاده کرلیاے تی کوڼ تی ګټو لچهلیاے. انتے ایکه دوچی بړے مشکل چی هوڼ هبو لوک مهاره دیس کو اوستی رنج لک چلی وه یاے چی دولت مهاره دیس کی نی هوڼ تاکڼو چنګو زمینه هاړ مارڼ کو تی زراعت کو اِس دیس مه برابڼ نی کیو، انتے هبو لوک مهاره دیس کو هوڼ هزیر دولت اِس دیس کی تی توقع درهاے چی چنګه زمینه نه هاړ مارڼ کاں نه هبه لوکاں اِس دیس کاں کابستی مساعد کرلیاے تا چی وی کرسکلیاے اڼه وخت مه ایک با اقتصاد ژیت درهالیاے.
انتے مهارو دیس افغانستان آګی تی اینګه ساری زیمیاں کا دهراڼ تی ایکو غنی دیس اے اسپو چی مهاره دیس مه هوڼ هزیر اِسه ساره اے چی اګر اون ساراں ته مهاره دیس کی حکومت کرسکلیاے چی پاڼیں اپړا لیاے، نو یو نه اسپو چی ایک اون هاړمارنه لوکاں کی ژیت چنګی هوے بلکه هبه لوک مهاره دیس کاں کی اقتصاد آګی چلی تی دیں تی دیں مهارو هبولوک دیس کو ایک ارام ژیت درهاے ګو، اسپو چی اګر ایکی دیس مه اقتصادی حالت اوس دیس کو چنګو هوے نو اوس دیس مه امنیت هم موچ جهب آي تی لوک ایک ارام ژیت هم موچ جهب اپړے.
نو پکاراے چی مهاره دیس کی حکومت اپڼه هبه امکاناتاں تی کم لچهلیاے تی کوشش کرلیاے چی چنګه زمینه کشت تی زراعت کانه اِس دیس کا هاړمارنه لوکاں ته برابڼ کرلیاے تا چی وی کرسکلیاے چنګه شکل پو اپڼی زیمیاں مه هاړ مارلیاے تی چنګو حاصل هت ته آڼ لیاے. نو محترمو چهوټی ګل یاے چی مهاره دیس افغانستان زراعت کا لحاظ تی ایکو چنګو دیس اے نو باید هم تم هبیں ایکی دوجه نه هت دیکی تی کوشش کرلیاں چی مهارو دیس زراعت کا لحاظ تی ایکو غنی دیس هوجاے.
