ایک حکومت تی نظام اسلامی ملت که قبال مه موچ مسؤلیت درهاے اګراون اپڼی مسولیتاں تی مکلفیتاں ته اپړجیاے تی چنګه شکل اداء کرلیاے، تی ملت که دل نه هت ته آڼ لیاے، نو ملت که توصیف کی هیټ هوی ګا، اګرغفلت کرلیاے اپنی مسولیتاں نه چنګه وزن پو اداء نه کرے، اوس صورت مه حکومت تی ملت که بیچ مه دیں پو دیں فاصله هوتهوچلی تی حکومت لوک دل مه منفور هوے، کیم جی هوڼ اسلامی امارت حکومت کی مولوڼی نه هت مه درهاے باید جی اپڼی مسولیتاں ته متوجه هوجی، ایس روم مه هوں کجاں تی مهم مسؤلیتاں حکومت کی نه تم پړناں ته داګ کروں اے.
ایک، امر باالمعروف تی نهی عن المنکر:
هباں تی پیلاں اسلامی حکومت کو حاکم مسؤلیت درهاے جی اپڼه رعیت نه چنګه کماں ته امر کرلیاے تی منداں کماں تی منه کرلیاے، الله تعالی حج کی سوره مه کیاے جی ۴۱ ایت « اوس کسناں جی میں زمیی مه قدرت دیتی، نواج نه پړے، زکات نه اداء کرے، امر باالمعروف تی نهی عن المنکر کرے، هباں کماں کو اخیر الله کو اے. ایس وزن پو پیامبر صلی الله علیه وسلم ایک حدیث مه ارشاد کیاے «هرکس تم نیں ایکو منکر کم ډیټو اوس نه پیل مه هت پو منع کرلیوں اګرهت پو تم نی منع نه کرهکیو، اپڼی ژیب پو منع کروں اګرایس که استطاعت نه هم نیں درهاته اپڼه دل مه مندو دکهوں یو ضعیف ترین درجو ایمان کو اے. علما کیاے جی حاکم کی مسؤلیت اے جی منکرنه منع کرلیاے».
دومیں، فقرکو ګماڼ:
ایکه اسلامی حکومت ایس نه اپڼو وجیبه دیکلیاے جی فقر تی غربت نه جامعه تی ګماں لیاے اسلام کو دین ایس کم که بستی اپڼی جوګی برنامه درهاے.کیړه وخت مه جی حضرت محمد صلی الله علیه وسلم نی حضرت معاذ والی که صفت پو یمن ته چلئ یو اوس ته کیو جی ماړ داراں تیں زکات لی تی فقیراں پو تقسیم کا، اګرحاکم ایس برنامه پو عمل کرلیاے نو کرسکیں جی فقرنه جامعه موچ تهوړه وخت مه ګماے، کی وزن جی عمر بن عبدالعزیز نی یو برنامه عملی کیو تهو. مؤرخین لکهیں جی عمر بن عبد العزیز که وخت مه ایکه نفر نی اپڼه ماړ کی زکات کدے تی کوچاں مه چهورلاے تهو جی ایکو فقیر پیده هوجی جی زکات نه اوس نه چادیاے ولی کویئن پیده نی هویں تهو.
تریمی، کم پیده کرن:
ایکو مهم کم حکومت کو کم پیده کرن ملت جوګی اے کیم جی باندو توب ایکه جامعه مه موچ ایک بړے معضله اے بی سرنوشت ملت تی باندے ایک جامعه مه ایک نظام که بستی بړو تهدید اے، کیړه وخت مه جی ملت باندے ریئ نو اوس وخت مه هررقم تهدید تی جنایات جامعه مه پیده هوے لکه جی چوری، راه مارن، قتل تی، هوراں کماں مه هت مارے، حاکم ته لازم اے جی اپڼی ملت نه مصروف رکهلیاے تی اپڼی جن نه بړاں تهدیداں تی نجات چادیاے.
چهارمی، سهولت نه ملت چوګی آڼ لیاے:
ایکه حکومت باید جی کوشش تی زحمت کرلیاے جی ملت جوګی سهولت تی ارامی نه تیار کرلیاے تی ابتدایی ضرورتاں اون کیاں نه هم رفع کرلیاے، تا ملت تی رعیت هر قسم اسانی تی سهولتاں تی اپڼی زندګی مه مامو هوجی.
پجمیں، سیکهڼ که زمینه مساعد کرلیاے:
سیکهڼ ایکو مهم تی بنیادی مسلو ایک ملت کو اے، حکومت مکلفیت درهاے جی لوړاں تی بیټکیاں که بستی سیکهڼ که وخت نه اسلام که چوکاټ کی هیټ تیار کرلیاے، کیم جی ملت تعلیم تی تحصیل که سبب پوترقی کرے، سیکهڼ پو کرسکاں جی هوراں دیساں ناړی سیالی کرلیاں.
چهیں می، امنیت:
مهم مسؤلیت ایکه نظام کی امنیت کواڼڼ ایکه جامعه مه اے جی لوک کی جن، ماړ، عزت کوک کی امن مه هویں، امنیت ایک مهم رول تی نقش انساناں کی زندګی مه درهاے، جامعه مه جی هوجی اوس صورت مه وه جامعه اګی تی، ترقی تی، اختراعات کرتهو چلی، امنیت تی باج جامعه مه اګی جاڼ کو امکان نی. ان شاء الله اسلامی امارت کرسکیں جی دیس مه موچاں کماں نه موفقیت پوموکالیاے تی دیس نه تمام شراں تی نجات چادیاے.
