اسلامي امارت او د بنسټيزو پروژو جوړولو ژمنتيا!
هيوادونه او ملتونه هغه مهال د پرمختګ او ترقي پر لوري ځي، چې مخلص او ژمن واکمنان ولري.
هيوادونه او ملتونه هغه مهال د پرمختګ او ترقي پر لوري ځي، چې مخلص او ژمن واکمنان ولري.
افغانستان چې لسګونه کلونه يې جګړو هرڅه له منځه وړي او د نړيوال پرمختګ له کاروان څخه ډېر وروسته پاتې دی، دغسې مخلصو او ژمنو واکمنانو ته ډېره اړتيا درلوده. شاوخوا دوه کاله وړاندې د الله تعالی په ځانګړې لورينه افغانستان څخه د اشغال ټغر ټول شو او يو ځواکمن اسلامي نظام د چارو واګې په لاس کې واخيستې.
د تلپاتې او سراسري امنيت سربيره اسلامي امارت د هيواد د بيارغونې او ځان بسياينې لپاره هم په محدودو امکاناتو ډېرې بنسټيزې پروژې پرانيستې او چارې يې په خورا ښه ډول پرمخ روانې دي.
وړمه ورځ د افغانستان اسلامي امارت د رياست الوزرا اقتصادي مرستيال او برېښنا وزير فراه ولايت ته سفر درلود او د بخش اباد بند د تونلونو چارې يې پرانيستې.
د بخش اباد بند د هيواد له مهمو او اساسي پروژو ګڼل کېږي چې د ۲۷ ميګاواټه بريښنا د توليد او د نږدې ۷۰ زره هکتاره ځمکې د خړوبولو ظرفيت لري.
د دغې مهمې پروژې پرانيسغونډه کې د رياست الوزرا اقتصادي مرستيال ملا عبدالغني برادر وويل چې وعدې يې يوازې د خولې نه دي، بلکې په عملي توګه د هيواد بيا رغونې او جوړونې ته ژمن دي او په ټول توان به هڅه وکړي چې افغانستان په پښو ودروي.
رښتيا هم اسلامي امارت ثابته کړې چې د هيواد پرمختګ او ترقي ته ژمن دي او په دې برخه کې يې چټک ګامونه هم پورته کړي دي.
