روزنامه هیواد

چین د لوړو زده کړو په برخه کې د مرستې ژمنه وکړه

دلوړو زده کړو وزارت سرپرست په کابل کې د چین د ولسی جمهوریت له سفیر سره په لیدنه کې دواړو خواوو د بورسونو پر زیاتوالی، د دواړو هېوادونو د پوهنتونونو تر منځ پر همکاریو، ګډو علمی څیړنو، دبدخشان پوهنتون او د نورستان د لوړو زده کړو نوې جوړې شوې موسسې کې د ټوریزم ډیپارټمنټونو د جوړولو، د بامیانو د ټوریزم له یپارټمنټ څخه د حمایت کولو او د دواړو هېوادونو د لوړو زده کړو وزارتونو ترمنځ د مرستو پر زیاتوالی بحث اوخبرې وکړې.

د لوړو زده کړو سرپرست وزیر په دې لیدنه کې د چین هیواد له سفیر څخه وغوښتل، چې د افغانستان د پوهنتونو د استادانو لپاره د خپلو کلنیو بورسونو ورکول زیات کړی.

همدا ډول پوهنمل عبدالتواب بالاکرزى د دواړو هیوادونو د پوهنتونو ترمنځ د علمی او څیړنیزو اړیکو د پراخوالی غوښتونکى شو او د افغانستان د علمی ملی ډیټابیس د جوړولو مقدماتې طرحه یې د چین سفیر ته وسپارله.

د لوړو زده کړو علمی مرستیال او سرپرست په بیلابیلو برخو کې په ځانګړی ډول د هېواد د لوړو زده کړو وزارت په برخه کې د چین هېواد له مرستو څخه مننه وکړه او ویې ویل: (( د چین جمهوریت د افغانستان له دولت سره تاریخی او پخوانۍ اړیکې لری او د افغانستان له خلکو سره د یاد هېواد علمی او اکاډیمیکې مرستې ښکاره او د قدر وړ دی. ))

د لوړو زده کړو سرپرست وزیر د لوړو زده کړو په پروګرامونو کې پرمختګ ته په اشارې سره وویل چې اړتیا ده تر څو د چین هېواد پوهنتونونه د افغانستان له پوهنتونو سره له دې زیات علمی او اکاډیمیک توأمیت ولری.

نوموړی د هیواد د ولایتونو د اهمیت په باره کې معلومات ورکړل او ویې ویل: ((د افغانستان ډیر ولایتونه لرغونی او ټوریسټی ځایونه لری او موږ په خپلو ولایتی پوهنتونو کې د ټوریسټی څانګو د ډیپارټمنټونو د جوړولو غوښتونکی یو او له دوست هیواد چین څخه غواړو چې په دې لاره کې دلوړو زده کړو وزارت سره مرسته وکړی.)) افغانستان لپاره د چین سفیر وانگ یو د لوړو زده کړو وزیر د وړاندیزونو په منلو سره وویل چې دغه غوښتنې به د خپل متبوع دولت مسوولینو ته ورسوی.

نوموړی د دواړو هیوادونو اړیکې تاریخی، نیکې او په ارزښتونو او ګډو ګټو ولاړې وبللې او ویې ویل چې موږ د دواړو هېوادونو ترمنځ د علمی او اکاډمیکو مرستو د زیاتوالی غوښتونکی یو.

ممکن است شما دوست داشته باشید