روزنامه هیواد

په پکتیا کې د کوکنارو کښت صفر شوی

د پکتیا ولایتی شورا وایی، چې پهدې ولایت کې د کوکنارو کښت صفر شوی، خو تقریباً پنځه کاله کېږی له بزګرو سره د هغو مرستو لړۍ درېدلې، چې د مرکزی ادارې لهخوا ژمنه ورسره شوې وه.۱۳ کاله مخکې د پکتیا د ولایتی شورا، قومی مشرانو او کرونده ګرو تر منځ پرېکړه وشوه، چې کرونده‎ګر به کوکنار نه‎کری، هغه و چې د دې پرېکړې له مخې په پکتیا کې د کوکنارو کښت صفر شو او مرکزی ادارې د دې کار په بدل کې له پکتیا ولایت سره د بدیل معیشیت په برخه کې د مرستو لړۍ پیل کړه، خو تقریباً پنځه کاله کېږی چې د مرستو دا لړۍ درېدلې ده.د پکتیا ولایت له نېشه‎یی توکو سره د مبارزې رییس ښاغلی ډاکټر حفیظ الله احمدزی وایی، په‎دې ولایت کې اوس کوکنار نه کرل کېږی، خو یوازې په یو شمېر لېرې پرتو سیمو کې بنګ کرل کېږی چې د مخنیوی لپاره یې هڅې روانې دی.ښاغلی احمدزی زیاتوی: هغه ټاکلی اندازه پیسې چې پخوا دوی ته د کوکنارو د نه کرل کېدو په مقابل کې ورکول کېدې اوس نه ورکول کېږی.

دی وایی:

(( تقریباً پنځه کاله کېږی چې دغه پیسې موږ ته نه راکول کېږی، پخوا به د کوکنارو اړولو لپاره هم ولایتونو ته یوه اندازه پیسې ورکول کېدې چې هغه هم اوس نه ورکول کېږی. زه پهدې برخه کې دوه نیمګړتیاوې وینم:

  • یو دا چې نړیوالې ټولنې د نېشهیی توکو په برخه کې له افغانستان سره خپله همکاری کمه کړې.بل د مسوولینو مدیریت هومره ښه نه دی، ځکه چې د دې پروګرام مدیریت یې په ښه توګه و نه شوای کولای.))

    د نېشه‎ یی توکو پر ضد ریاست له‎خوا د ورکړل شویو معلوماتو له مخې: د ښو فعالیتونو یا ((جی.پی.ای)) پروګرام له لارې په پکتیا کې د نېشه یی توکو پر وړاندې د مبارزې ریاست ته تر ۲۰۱۵ میلادی کال پورې په کال کې یو مېلیون امریکایی ډالر د امتیاز یا انعام په ډول ورکول کېدل.د چارواکو په خبره د دې پیسو ډېره برخه د ولایتی ادارې او بزګرو په خوښه په عام المنفعه پروژو باندې لګول کېده لکه پکتیا پوهنتون، میخانیکی لېسه، د جرګو تالار، د جوماتونو او ښوونځیو لپاره د ودانیو جوړول وو.اوس چې د مرستو دا لړۍ بنده شوې، د پکتیا ولایتی شورا اندېښنه لری، چې که پکتیا ته بېرته دا امتیاز ور نه‎کړل شی، امکان لری چې بزګر بېرته د کوکنارو کښت ته مخه کړی.د پکتیا د ولایتی شورا غړی ممتاز کرخېل وایی پکتیاوالو ۱۳کاله وړاندې له حکومت سره ژمنه کړې وه، چې په خپلو مځکو کې به کوکنار نه‎کری او اوس هم پر خپله ژمنه ولاړ دی، خو اړونده دولتی ادارو پر خپلو وعدو وفا و نه کړه او څلور کاله کېږی چې پکتیا والو ته دا امتیاز نه دی ورکړل شوی.دی وایی: (( څو کاله وړاندې پکتیاوالو ژمنه وکړه ، چې موږ د دې بوټی پرضد د زړه له کومې مبارزه کوو، دوی په عمل کې ثابته کړه، چې دا دی اوس په پکتیا کې د کوکنارو یو بوټی هم نه شته، خو هغه ادارې چې د نېشه یی توکو پرضد د مبارزې شعار ورکوی هیله ده، چې دا شعار عملی کړی. زموږ بزګران دې بیا دې ته نه مجبوروی، چې په هغه یوه لوېشت مځکه کې کوکنار وکری ،چې حاصلات یې د اوبو بیه هم نه شی پوره کولای.))پکتیا غرنی ولایت دی، چې زراعتی مځکې یې لږ دی، ځکه نو بزګران تل هڅه کوی په خپلو مځکو کې داسې څه وکری ، چې ډېره ګټه ځنې ترلاسه کړی، همدا لامل و چې یوه لسیزه وړاندې پکتیاوالو د کوکنارو کښت ته مخه کړې وه.  

                           اصیل ځاځی

ممکن است شما دوست داشته باشید