روزنامه هیواد

ولسمشرغنی د کورونا دوهمې څپې لپاره د هر ډول چمتووالی امر کړی

د افغانستان د اسلامی جمهوریت جمهوررییس محمد اشرف غنی پرون له غرمې مخکې د کابل ولایت د ۱۹ دولتی روغتونونو رییسانو سره په ارګ کې وکتل.په دغه کتنه کې چې د عامې روغتیا وزارت سرپرست  هم حضور درلود، جمهوررییس غنی د کورونا لومړۍ څپې د مهارولو تجربې ته په اشارې وویل: د کورونا دویمې څپې مهارولو مدیریت د حکومت لومړیتوب دی او له ټولو ډاکترانو او روغتیایی کارکوونکو څخه چې له کورونا سره د مبارزې په لومړۍ کرښه کې خدمت کوی، مننه کوم.جمهوررییس وویل: د هېواد د روغتیا ملی پروګرام په اساسی ډول بیاکتنې ته اړتیا لری او روغتیایی خدمتونه به د پایلو پر اساس ارزول کېږی. ده زیاته کړه: په روغتونونو کې دې عاجل اصلاحات عملی شی، ترڅو روغتیایی خدمتونه لا نور هم اغېزناک شی.د عامې روغتیا وزارت سرپرست احمد جواد عثمانی وویل: په روغتونونو کې د اصلاحاتو لپاره په دوو عاجلو او بنسټیزو برخوکې د روغتونونو د ښه والی ملی پلان ترتیب شوی او ژر به په مدیریت او خدمتونو کې بنسټیز تغییرات راشی. د کابل د ۱۹ روغتونونو د رییسانو په استازیتوب د رابعه بلخی روغتون رییسې صدیقې عبدالله ادیب، د ملالۍ روغتون رییسې هما اکسیر، د وزیر محمد اکبر خان روغتون رییس سید عبدالله احمدی او د ابن سینا صدری روغتون رییس امیر پاچا منګل د نویو ډاکترانو او روغتیایی کارکوونکو د ګومارلو، د درملو او طبی وسایلو دکموالی، په کلیدی پوسټونو د غیر مسلکی کسانو د ګومارلو مخنیوی او د ظرفیتونو د پیاوړتیا په اړه خپل وړاندیزونه مطرح کړل.د افغانستان د طبی شورا رییسې نسرین اوریاخېل وویل: د روغتیایی خدمتونو د ښه والی لپاره د څارنې سیستم باید پیاوړی او د روغتونونو  د ښه والی ملی پلان تطبیق شی.جمهوررییس وویل: عامې روغتیا وزارت دې د روغتونونو د ښه والی ملی پلان د تطبیق عاجل اقدامات وکړی چې ژر تر ژره د کابل په کچه خلک په روغتیایی خدمتونو کې مثبت تغییرات حس کړی. مسوولین دې د درملو، طبی وسایلو او د بشری قوې د کموالی پوره کولو لپاره واضح وړاندیزونه ترتیب کړی، چې حکومت یې پر اساس اقدامات وکړی.  

ممکن است شما دوست داشته باشید