روزنامه هیواد

دښمن به هېڅکله په غیر انسانی کړنو موخې ته ونه رسېږی

په کابل کې د وړم مازیګر چاودنې سخت غبرګونونه راپارولی.د ملی امنیت سلاکار حمدالله محب  چې د کابل ښار د وروستی چاودنې د ټپیانو پوښتنې لپاره روغتون ته ورغلی وو دا برید غیر انسانی عمل وباله.ده زیاته کړې ، چې (( د افغانستان د خلکو دښمنان به د داسې غیر انسانی کړنو او بریدونو په ترسره کولو سره هېڅکله هم خپلو موخو ته ونه رسېږی.))په ورته مهال پخوانی ولسمشر حامد کرزی هم پر بوږنووونکې چاودنې سخت غبرګون ښودلی.هغه دا برید بشر ضد او غیر انسانی عمل بللی، چې میندې د خپلو ماشومانو پر وړاندې په یوه وحشیانه پېښه کې ټپی کېږی.کرزی په هېواد کې پر ډېرېدونکی تاوتریخوالی هم جدی اندېښنه ښودلې او زیاته کړې یې ده، چې اوس په هېواد کې د پردیو د ګټو جګړه روانه ده، چې له امله یې هره ورځ بې ګناه خلک قربانی کېږی.د یادونې وړ ده، چې د کابل ښار په برکی څلور لارې کې وړم مازیګر د پولیسو پر رنجر ډوله موټر چاودنه وشوه ، چې له امله یې ښځې او ماشومان ټپیان شول.ددې پېښې انځورونو او ویډیوګانو په ټولنیزو رسنیو کې توند غبرګونونه پارولی او هغه یې یو غیر انسانی او وحشتناک عمل بللی دی.

ممکن است شما دوست داشته باشید